ހޮނިހިރު ބަތްޕެނުގެ ބާރު ދައްކާލައި އޭދަފުށި ގުރޫޕްގެ އެއްވަނައިގައި ކުއާޓާ އަށް

ގޯލްޑް ކަޕްގައި މިއަދު ހއ. ދިއްދޫ 4-1 އިން ބަލިކޮށް ބ. އޭދަފުށި ގުރޫޕްގެ އެއްވަނައިގައި ކުއާޓާ ފައިނަލުން ޖާގަ ހޯދައިފި އެވެ.

އޭދަފުށި ފުރަތަމަ މެޗުގައި ކ. މާފުށި އަތުން 2-0 އިން ބަލިވި އިރު, މާފުށި ވަނީ ދިއްދޫ އަތުން 2-0 އިން ބަލިވެފަ އެވެ. މިއާ އެކު އޭދަފުއްޓަށް ކުއާޓާގެ ޖާގައެއް ޔަގީން ކުރެވެން އޮތީ ތިން ގޯލުގެ ތަފާތަކުން މޮޅުވެގެންނެވެ.

މި ނަތީޖާއާ އެކު ތިން ޓީމަށް ވެސް ތިން ޕޮއިންޓް ލިބިފައި ވާއިރު, އޭދަފުއްޓަށް ވަނީ ފައިދާ އެއް ގޯލާ އެކު އެއްވަނަ ލިބިފަ އެވެ. ދެވަނައިގައި އޮވެ ކުއާޓާގެ ޖާގައެއް ޔަގީން ކުރި ފައިދާ ގޯލެއް ނެތް މާފުއްޓެވެ. ދިއްދޫން ދެ މެޗުން ތިން ގޯލު ޖެހި އިރު, އެޓީމު ކޮޅަށް ހަތަރު ގޯލު ވަދެފައިވެ އެވެ.

އޭދަފުށިން މިއަދުގެ މެޗުގައި ފުރަތަމަ ގޯލު 21 ވަނަ މިނިޓުގައި ޖެހީ އަލީ ނަސީމް (ދިއްލި) އެވެ. ލީޑު ފުޅާ ކުރި ގޯލު 65 ވަނަ މިނިޓުގައި ޖަހައިދިނީ އަބްދުޛ ޖައުޝަން މުހައްމަދު (ޖައު) އެވެ. ދެ ގޯލުގައި ވެސް އިޝާން އޮިބްރާހިމް (ސައްޓު) ވަނީ މުހިއްމު ދައުރެއް އަދާކޮށްފަ އެވެ.

އޭދަފުށީގެ ފަހު ދެ ގޯލު ޖަހައިދިނީ މުހައްމަދު ފާސިރު (ފާއްޓޭ) އެވެ. މެޗުގެ 85 ވަނަ މިނިޓުގައި އޭދަފުށީގެ ސަޕޯޓަރުން ކައްކުވާލި ގޯލު ޖަހައިދިނީ ދިއްދޫގެ ގޯލްކީޕަރު ކައިރިން ވެސް ނައްޓާފަ އެވެ. އަދި ހަތަރުވަނަ ގޯލު ޖެހީ އިތުރު ވަގުތުގެ ގޮތުގައި ދެއްކި ނުވަ މިނިޓުގެ ތެރެއިން ހަތަރުވަނަ މިނިޓުގަ އެވެ.

ދިއްދޫގެ ހަމައެކަނި ގޯލު އިތުރު ވަގުތުގެ ނުވަވަނަ މިނިޓުގައި ޖަހައިދިނީ ހުސެއިން ޒިމްޔާން އެވެ.

ދިއްދޫގެ ގޯލަށް ފަހު, ރެފްރީގެ ނިންމުންތަކާ މެދު ހިތްހަމަ ނުޖެހިގެން މި މެޗުގެ އިތުރު ވަގުތުގައި ރެ ޓީމުގެ ބެންޗުން ވެސް ވަނީ ދަނޑަށް އަރައިފަ އެވެ. މި ހަމަނުޖެހުންތަކާ ގުޅިގެން އޭދަފުށީގެ ބެންޗުގައި އިން އިބްރާހިމް ޝަރީފް އާއި ދިއްދޫގެ ފާއިގް އަހުމަދަށް ވަނީ ރަތް ކާޑު ދައްކައިފަ އެވެ.

އޭދަފުށީގެ ގޯލްކީޕަރު އަލީ އަޖުފާޞް އަމްޖަދު ވަނީ މާފުއްޓާ ދެކޮޅަށ ްކުޅުނު މެޗުގެ ފަހު ވަގުތު ދެއްކި ރަތް ކާޑާ އެކު އެއް އަހަރު ދުވަހަށް ނައިންޓީ ޕްލަސް އިން ހިންގާ މުބާރާތްތަކުން ސަސްޕެންޑް ކޮށްފަ އެވެ. މިއާ އެކު އޭދަފުށީގެ ގޯލް މިއަދު ބެލެހެއްޓީ އޭނާގެ ބޭބެ, ކުރީގެ އެއްވަނަ ޑިވިޝަނުގެ ތަޖުރިބާކާރު ގޯލްކީޕަރު އަބްދުالله ޒިޔަޒަން އެވެ.

މީގެ އިތުރުން ރިލީސް ފީގެ ގޮތުގައި 75,000 ރުފިޔާ ދެއްކުމަށް ފަހު, އޭދަފުށީ ޓީމުން ވަނީ ކްލަބް އީގަލްސް އަށް ކުޅޭ އޭދަފުށީގެ ނިޝާމް މުހައްމަދު ރަޝީދު (ޕޮގް) ވެސް މިއަދުގެ މެޗުގައި ފުލް ކޮށް ކުޅުވައިފަ އެވެ.

ކުއާޓާ ފައިނަލްގައި އޭދަފުށި ބައްދަލުކުރާނީ ޅ. ނައިފަރާއި އައްޑޫ ސިޓީ އަދި ދ. މީދޫ ހިމެނޭ ގުރޫޕްގެ ދެވަނަ ހޯދާ ޓީމަކާ ދެކޮޅަށެވެ. އަދި މާފުށި ބައްދަލުކުރާނީ އެ ގުރޫޕުގެ އެއްވަނައާ ދެކޮޅަށެވެ.