Sidibari
އަންނަ އަހަރުގެ ރާއްޖޭގެ ގައުމީ ސާފިން ޓީމު އެކުލަވާލައިފި އެވެ.
ސާފިންގެ ގައުމީ ޓީމަށް އެތުލީޓުން ހޮވަނީ ކޮންމެ އަހަރެއްގެ ގައުމީ ލީގުގެ ރޭންކިން އަށް ބަލައިގެންނެވެ. އެގޮތުން މިއަހަރުގެ ލީގުގެ ގަދަ ރާޅާއެޅުންތެރިންނަށް ވަނީ އަންނަ އަހަރުގެ ސީނިއާ ގައުމީ ޓީމުން ފުރުސަތު ދީފަ އެވެ.
އަންނަ އަހަރުގެ ގައުމީ ޓީމުން ފުރުސަތު ހޯދީ, ލީގުގެ ޗެމްޕިއަން ހޫދު އަހުމަދު (ހޫބްޒް), އިސްމާއިލް މިގްލާލް (ކުޑަ އިއްސެ), ނަޖާހު މުހައްމަދު (ކަބޯ), އިސްމާއިލް ރަޝީދު (ސްމައިލީ), އަހުމަދު އާގިލް (އަންމަޑޭ) އަދި ޖޫނިއާ ސާފަރު ޔޫސުފް ކަޔާން ހަމްދާން ޒަކީ އެވެ.
މިއީ އުމުރުން އުމުރުން 14 އަހަރުގެ ކަޔާން, ސީނިއާ ގައުމީ ޓީމުން ފުރުސަތު ހޯދި ފުރަތަމަ ފަހަރެވެ. ލީގު ރޭންކިންގެ ހަވަނަ ހޯދި ކަޔާން ވަނީ މިދިޔަ އަހަރާއި މި އަހަރު ވެސް ރާއްޖޭގެ ޖޫނިއާ ގައުމީ ޓީމުގައި ހިމެނިފަ އެވެ.
މިއީ ޖޫނިއާ ރާޅާއެޅުންތެރިއަކަށް ސީނިއާ ގައުމީ ޓީމުގެ ޖާގަ ލިބުނު ފުރަތަމަ ފަހަރު ވެސް މެއެވެ. ކަޔާން ވަނީ މިއަހަރުގެ ލީގުގައި މ. މުލީގައި އޮތް މުބާރާތުގެ އޯޕަން ބައިގެ ފައިނަލްގައި ވާދަކޮށް ދެވަނަ ހޯދައިފަ އެވެ. އަދި ކ. ތުލުސްދޫގައި ބޭއްވި މުބާރާތުގެ އޯޕަން ބައިގެ ސެމީ ފައިނަލަށް ވެސް ދަތުރު ކުރި ކަޔާން ވަނީ ގދ. ގައްދޫގައި ބޭއްވި މުބާރާތުގެ ކުއާޓާ ފައިނަލްގައި ވާދަ ކޮށްފަ އެވެ.
