Ansar Ibrahim
ދުނިޔޭގެ 15 ވަނަ ވޯލްޑް ބޮޑީބިލްޑިން އެންޑް ފިޒީކް ސްޕޯޓްސް ޗެމްޕިއަންޝިޕްގައި ރަން މެޑަލް ހޯދައި، ރާއްޖޭގެ އަޒްނީން ރަޝާދު، އޭނާގެ ރަން މެޑަލް ސްޓްރީކް ދަމަހައްޓައިފިއެވެ.
އަޒްނީން ވަނީ އޭނާގެ ރަސްމީ އިވެންޓް ކަމަށްވާ ސްޕޯޓްސް ފިޒީކްގެ 170 ސެންޓިމީޓަރު ކެޓަގަރީން ޖެހިޖެހިގެން ތިންވަނަ ރަން މެޑަލް ހޯދާފައެވެ. އެއީ މިދިޔަ އަހަރު ދެކުނު ކޮރެއާގެ ވޮންޖޫ ސިޓީގައި ބޭއްވި ދުނިޔޭގެ މުބާރާތާއި, 2022 އަހަރު ރާއްޖޭގައ ބޭއްވި އޭޝިޔާގެ މުބާރާތާއި ނޭޕާލްގެ ކަތަމަންޑޫގައި ބޭއްވި ދެކުނު އޭޝިޔާގެ މުބާރާތުންނެވެ. އައްޑޫ ސިޓީ ކެނަރީފް ރިސޯޓުގައި ކުރިއަށްދިޔަ މުބާރާތުގައި އަނެއްކާ ވެސް އޭނާވަނީ މި ބައިން ރަން މެޑަލް ހޯދާފައެވެ. މީގެ ކުރިން އަޒްނީން ވަނީ މޯލްޑިވްސް ސްޕޯޓްސް އެވޯޑްސްގެ އެންމެ މޮޅު އެތުލީޓުގެ މަގާމު ވެސް ހޯދާފައެވެ.
ރަން މެޑަލް ތަކުރާރު ކުރުމަށްފަހު އަޒްނީންވަނީ އޭނާގެ ސަޕޯޓަރުންނަށް ހާއްސަ މެސެޖެއް ފޭސްބުކް މެދުވެރިކޮށް ހިއްސާކޮށްފައެވެ.
“ލޯބިވާ ސަޕޯޓަރުންނޭ. ގައުމަށް ރަން މެޑަލް ހޯދައިދީފައިވާ މި ދާއިރާ އިން ކުރިއަށްދިއުމަށް އަދި ރާއްޖެ އަށް އަބަދުވެސް ރީތިނަން ހޯދައިދިނުމަށް މަސައްކަތް ކުރަމުންދާ އެތުލީޓެއްގެ ހައިސިއްޔަތުން ބައިނަލްއަގުވާމީ ލެވަލްގައި ވާދަކުރުމަކީ ވަކި ފަރުދަކަށް އެސޯސިއޭޝަނެއް ނުލައި ކުރެވޭނެ ކަމެއް ނޫން ކަމަށްވުމާ އެކު، އަޅުގަނޑުމެންގެ އެސޯސިއޭޝަން ބޮޑީބިލްޑިން ޓޯނަމެންޓް ބޭއްވި މަގުސަދު ފުށޫއަރާގޮތަށް ސިޔާސީ ބޭނުމެއްގައި މިކަން ނުކުރެއްވުމަށް ނިހާޔަތަށް އެދެމެވެ.” އަޒްނީން ލިޔެފައި ވެއެވެ.
މިފަހަރުގެ ބޮޑީބިލްޑިން މުބާރާތުގައި ރާއްޖޭގެ އެތްލީޓުން ވަނީ އިތުރު ކާމިޔާބީތަކެއް ވެސް ހޯދާފައެވެ. އެގޮތުން ސުޕަ ކެޓަގަރީގެ 75 ކިލޯގައި, ރާއްޖޭގެ ޖޫނިއާ އޯޕަން ޗެމްޕިއަން ކަމަށްވާ ޔޫސުފް އަޔާން ރިޒްވީ ވަނީ، ރިހި މެޑަލް ހާސިލްކޮށްފައެވެ. މީގެ އިތުރުން, ޝާހީން އިބްރާހިމް ދީދީ ވަނީ ރާއްޖެއަށް ތާރީހީ ކާމިޔާބެއް ހޯދައިދީފައެވެ. އެއީ ހާއްސަ ކެޓަގަރީއެއްގެ ގޮތުގައި ކުރިއަށްދާ 55 ކިލޯގެ އިވެންޓުގައި ރަން މެޑަލް ހޯދައިގެންނެވެ.
