މިސްޓަ މޯލްޑިވްސްގެ މަގާމް ނަހްޔާން އަށް

މިސްޓަ މޯލްޑިވްސް 2024 ގެ ޓައިޓަލް، މުަހައްމަދު ނަހްޔާން ހޯދައިފި އެވެ.

މިއީ ނަހްޔާން މި މަގާމް ހޯދި ފުރަތަމަ ފަހަރެވެ. ދަރުބާރުގޭގައި ރޭ ބޭއްވި 22 ވަނަ ގައުމީ ބޮޑީބިލްޑިން އެންޑް ސްޕޯޓްސް ފިޒީކް ޗެމްޕިއަންޝިޕްސްގައި އޭނާ މި މަގާމް ހޯދީ ޝާހީން އިބްރާހީމް ދީދީއާ ވާދަކޮށެވެ.

ނަހްޔާން ވަނީ މުބާރާތުގެ ބޮޑީބިލްޑިން 85 ކިލޯގްރާމް ކެޓެގަރީން އެއްވަނަ ހޯދައިފަ އެވެ.

މިއަހަރު އޮތް ސައުތު އޭޝިއަން ބޮޑީބިލްޑިން ޗެމްޕިއަންޝިޕްގައި 75 ކިލޯގްރާމް ކެޓެގަރީން ރަން މެޑަލް ހޯދި ބޮޑީބިލްޑަރު ވަނީ މީގެ ކުރިން 2017 ވަނަ އަހަރުގެ މިސްޓަ މޯލްޑިވްސްގައި މިޑްލްވެއިޓް ކެޓަގަރީން ދެވަނަ އަދި 2021 ވަނަ އަހަރު 170 ސެންޓިމީޓަރު އެތުލެޓިކް ފިޒީކް ކެތަގަރީން ތިންވަނަ ހޯދައިފަ އެވެ.

ފާއިތުވި ތިން އަހަރު މިސްޓަ މޯލްޑިވްސްގެ މަގާޟް ހޯދި މުހައްމަދު ޔާމީން، މިއަހަރުގެ މުބާރާތުގައި ވާދައެއް ނުކުރެ އެވެ.

މިއަހަރުގެ މިސްޓަ މޯލްޑިވްސްގައި އެތުލެޓިކް ފިޒީކް ޗެމްޕިއަންކަން ހޯދާފައި ވަނީ، މި ކެޓެގަރީގެ 175 ސެންޓިމީޓަރުން ވެސް އެއްވަނަ ހޯދި އަބްދުﷲ އަހުސަން އެވެ. އެތުލެޓިކް ފިޒީކް 180 ސެންޓިމީޓަރުގެ އެއްވަނަ ހޯދީ ހުޒާމް ހަމީދެވެ. އަދި އެތުލެޓިކް ފިޒީކް 160 ސެންޓިމީޓަރުގެ އެއްވަނަ ހޯދީ ޝާލު އިބްރާހީމް އެވެ.

މުބާރާތުގެ ސްޕޯޓްސް ފިޒީކްގެ ޗެމްޕިއަންކަން އަޒްނީން ރަޝާދު ވަނީ ޖެހިޖެހިގެން ފަސްވަނަ ފަހަރަށް ހޯދައިފަ އެވެ. އޭނާ ވަނީ ސްޕޯޓްސް ފިޒީކް 170 ސެންޓިމީޓަރުގެ އެއްވަނަ ވެސް ހޯދައިފަ އެވެ. އަދި ސްޕޯޓްސް ފިޒީކްގެ 175 ސެންޓިމީޓަރުގެ އެއްވަނަ ހޯދީ މުހައްމަދު ފަޒްލީން އެވެ.

ބޮޑީބީލްޑިން 65 ކިލޯގްރާމްގެ އެއްވަނަ ހޯދާފައި ވަނީ މަނާފް ވަހީދު އެވެ. އަދި ބޮޑީބިލްޑިން މާސްޓާސް 40 އަހަރުން މަތީގެ އޯޕަން ކެޓަގަރީގެ އެއްވަނަ ހާސިލްކޮށްފައިވަނީ ޝާހީން އިބްރާހީމް ދީދީއެވެ.

ޖޫނިއާ ސްޕޯޓްސް ފިޒީކްގެ އޯޕަން ކެޓަގަރީން އެއްވަނަ  ހޯދީ ހުސެއިން ރާހިލް ސާދިގު އެވެ. އަދި ޖޫނިއާ އޯޕަން ބައިން އެއްވަނަ ހޯދީ ޔޫސުފް އަޔާން ރިޒްވީއެވެ.

މިއަހަރުގެ މިސްޓަ މޯލްޑިވްސްގެ ޓީމް ޗެމްޕިއަންޝިޕުގެ އެއްވަނަ ހޯދާފައިވަނީ ދިވެހި ސިފައިންގެ ކުލަބެވެ.