ކާވާ ޗެލެންޖް ކަޕްގެ އެންމެ މޮޅު އިންޑިވިޖުއަލް ކުޅުންތެރިއަކަށް ކުޑަކާއްޓޭ

އުޒްބެކިސްތާނުގައި ކުރިއަށް ގެންދިޔަ ކާވާ ވޮލީބޯލް ޗެލެންޖް ކަޕްގެ އެންމެ މޮޅު އިންޑިވިޖުއަލް ކުޅުންތެރިޔާގެ އެވޯޑް ރާއްޖޭގެ ކެޕްޓަން އިސްމާއިލް ސާޖިދު (ކުޑަކާއްޓޭ) ހޯދައިފި އެވެ.

އެގޮތުން ކުޅުންތެރިންގެ ސްޕައިކް އާއި ބްލޮކް އަދި ސާވް އަށް ބަލައި ކުޑަކާއްޓޭ އަށް ވަނީ ޖުމްލަ 110 ޕޮއިންޓް ލިބިފަ އެވެ. އެއީ ސްޕައިކަށް 99 ޕޮއިންޓް، ބްލޮކަށް ނުވަ ޕޮއިންޓް އަދި ސާވް އަށް ދެ ޕޮއިންޓް ހޯދައިގެންނެވެ. އޭނާއާ އެންމެ ގާތުން ވާދަކުރީ ޖުމްލަ 95 ޕޮއިންޓް ލިބުނު ތުރުކުމެނިސްތާންގެ ވެއިސޯ ބޭރަމްގެލްޑީ އެވެ.

ރާއްޖެ ވަނީ ހަ ގައުމު ވާދަކުރި މި މުބާރާތުގެ ފަސްވަނަ ހޯދައިފަ އެވެ. ރައުންޑް ރޮބިން ބުރުގެ ފުރަތަމަ މެޗުގައި ކިރްގިސްތާނާ ވާދަކޮށް ސީދާ ތިން ސެޓުން ބަލިވި އިރު، ތުރުކުމެނިސްތާން އަތުން ބަލިވީ 3-2 ސެޓުންނެވެ. އަދި އަފްޣާނިސްތާނާއި އުޒްބަކިސްތާން އަތުން ވެސް ބަލިވީ ސީދާ ތިން ސެޓުންނެވެ.

ރައުންޑް ރޮބިން ބުރުގެ ފަހު މެޗުގައި ރާއްޖޭޏް ވަނީ 3-1 ސެޓުން ތަޖިކިސްތާން ބަލިކޮށްފަ އެވެ. އަދި ފަސްވަނަ ހޯދީ ރޭންކިން މެޗުގައި ވެސް 3-1 ސެޓުން ތަޖިކިސްތާން ބަލިކޮށްފަ އެވެ.

މި މުބާރާތުގެ ޗެމްޕިއަންކަން ހޯދީ ކިރިގިސްތާނެވެ.