Sidibari
ދިވެހި ސާފް ލީގު 2024 ގެ މެންސް އޯޕަން ބައިގެ ޗެމްޕިއަންކަން ހޫދު އަހުމަދު ކާމިޔާބު ކުރި އިރު، 18 އަހަރުން ދަށުގެ ޖޫނިއާ ބައިގެ ޗެމްޕިއަންކަން މުހައްމަދު އިނާން ހޯދައިފި އެވެ.
މިއީ ދެ ރާޅާއެޅުންތެރިން ވެސް ލީގު ކާމިޔާބު ކުރި ފުރަތަމަ ފަހަރެވެ. ހޫދު ވަނީ މިއަދު ނިމުނު ލީގުގެ އެންމެ ފަހު އިވެންޓް ކަމަށްވާ ރަންނަމާރި ޗެލެންޖްގެ މެންސް އޯޕަން ބައިގެ ޗެމްޕިއަންކަން ވެސް ހޯދައިފަ އެވެ.
ރަންނަމާރި ޗެލެންޖްގައި ޖޫނިއާ ބައިގެ ޗެމްޕިއަންކަން ހޯދީ ޔަސީން އަހުމަދު ނާޝިދެވެ. އިނާން ކެޓީ ކުއާޓާ ފައިނަލާ ހަމައިންނެވެ.
ރަންނަމާރި ޗެލެންޖްގެ އޯޕަން އަދި ޖޫނިއާ ބައިގެ ފައިނަލްގައި ވެސް ޔޫނިއާ އެތުލީޓް ކަޔާން އަބްދުﷲ އަރީފް ވާދަކޮށްފައިވެ އެވެ.
ރަންނަމާރި ޗެލެންޖްގެ އަންހެން ބައިގެ ޗެމްޕިއަންކަން ވިދިވިދިގެން ހަތަރުވަނަ ފަހަރަށް ހޯދީ މަރިޔަމް ރާހިލް ނަސީމް (އާޔާ) އެވެ. އަދި މާސްޓާސް ބައިގެ ޗެމްޕިއަންކަން ހޯދީ އަހުމަދު މައުރޫފް އެވެ.
ޓީމް އިވެންޓް ކަމަށްވާ މަރުހަބާ ކަޕްގެ ޗެމްޕިއަންކަން ހޯދީ ކ. މާލޭ ޓީމެވެ. މި ޓީމުގައި ހިމެނުނު ރާޅާއެޅުންތެރިންނަކީ ޔޫސުފް ކަޔާން ހަމްދާން ޒަކީ، މުހައްމަދު ފަޔާޒް، ޔަސީން އަދި ސައްޔިދު ސަލާހުއްދީން އެވެ.
މިއަހަރުގެ ސާފް ލީގުގައި ހަތަރު އިވެންޓެއް ކުރިއަށް ގެންދިޔަ އެވެ. ގައްދޫގައި ބާއްވާ ކަޅެގަލެކޮޑާ އަށް ފަހު މ. މުލީގައި މުލީކޮޅު ރާޅުގަނޑު މުބާރާތް ކުރިއަށް ގެންދިޔަ އެވެ. ރަންނަމާރި ޗެލެންޖްގެ ކުރިން އޮތީ ކ. ތުލުސްދޫގައި ބާއްވާ ރަންދާ ރާޅުގަނޑު މުބާރާތެވެ.
