Ansar Ibrahim
ރިވައިވަލް ސްޕޯޓްސް ކްލަބުން ބެޑްމިންޓަން އެސޯސިއޭޝަން އޮފް މޯލްޑިވްސް އިން ތަފާތުކުރުން ގެންގުޅޭ ކަމަށް ބުނެ ވޯލްޑް ބެޑްމިންޓަން ފެޑެރޭޝަން (ޑަބްލިއުބީއެފް) ގެ އާބިޓްރޭޝަނަށް މައްސަލަ ހުށަހަޅައިފި އެވެ.
ރާއްޖޭގެ މަޝްހޫރު ބެޑްމިންޓަން ކްލަބެއްގެ ހައިސިއްޔަތުން ރިވައިވަލް ސްޕޯޓްސް ކްލަބަކީ ބީއޭއެމްއިން އިންތިޒާމުކޮށްގެން ބާއްވާ މުބާރާތްތަކުގައި ގަވާއިދުން ބައިވެރިވާ ކްލަބެއް ކަމަށާއި އެ ކްލަބުގެ ކުޅުންތެރިންނަކީ ބައިނަލްއަގުވާމީ މުބާރާތްތަކުގައި ރާއްޖެ ތަމްސީލު ކުރާ ކުޅުންތެރިން ކަމަށެވެ.
ނަމަވެސް ބެޑްމިންޓަން އެސޯސިއޭޝަނުން ވަނީ ބީއޭއެމްގެ އެކްސްޓްރާ އޯޑިނަރީ ކޮންގްރެސްއިން އެ ކްލަބު އުނިކޮށް، ކުރިއަށް އޮތް އިންތިޙާބުގައި އެ ކްލަބަށް ވޯޓް ނުލެވޭނެ ގޮތަށް ނިންމައިފައެވެ.
ޑަބްލިއުބީއެފްގެ ޖެނެރަލް ސެކްރެޓަރީ ތޯމަސް ލަންޑަށް އެޑްރެސްކޮށް ރިވައިވަލް ސްޕޯޓްސް ކްލަބުން ފޮނުވި ސިޓީގައި ވަނީ ބީއޭއެމްގެ ތަފާތުކުރުންތަކާ މެދު ކަންބޮޑުވުން ފާޅުކޮށްފައެވެ.
ރިވައިވަލް ސްޕޯޓްސް ކްލަބުގެ މުބާރާތްތަކުގައި ބައިވެރިނުވާ ކަމަށް ބުނެ ބީއޭއެމް އިން ވަނީ އެ ކްލަބަށް ވޯޓުލުން މަނާކުރަން ނިންމި ނިންމުން ދިފާއުކޮށްފައެވެ.
ރިވައިވަލް އެސްސީން ބުނީ ބީއޭއެމްއިން އެފަދަ ވާހަކައެއް ދެއްކި ސަބަބަކީ އެއްވެސް އަސާސެއް ނެތް ވާހަކަތަކެއް ކަމަށާއި، އެ ކްލަބުން މެމްބަރުކަމަށް ޝަރުތުހަމަކޮށްފައިވާތީ ކަމަށެވެ.
“.. އެސޯސިއޭޝަންގެ އެކްސްޓްރާ އޯޑިނަރީ ކޮންގްރެސްގައި ކުރީ ދެ އަހަރު ހަރަކާތްތެރިވި އެސޯސިއޭޓް މެމްބަރުން [ކްލަބްތަކަށް] ވޯޓުލުމުގެ ހައްގު (ވެސް) އެބައޮތް.”
ބެޑްމިންޓަން އެސޯސިއޭޝަން އޮފް މޯލްޑިވްސްގެ އޭއޯއޭ، 32 ވަނަ މާއްދާގެ (ގ)
“ކްލަބް މުބާރާތްތަކުގައި އަހަރީ ބައިވެރިވުމުގެ ރޭޓް 75 ޕަސެންޓް އޮންނަ ކްލަބްތަކަށް އެ އެސޯސިއޭޝަންގެ އެކްސްޓްރާ އޯޑިނަރީ ކޮންގްރެސްގައި ވޯޓު ލުމުގެ ހައްގު އޮންނާނެ”
ބެޑްމިންޓަން އެސޯސިއޭޝަން އޮފް މޯލްޑިވްސްގެ އޭއޯއޭ، 12 ވަނަ މާއްދާގެ (ހ)
އެ ކްލަބުން މީގެ ކުރިން ބީއޭއެމްއަށް ފޮނުވި ސިޓީއަކުން އެ މައްސަލަ ހައްލުކޮށްފައިވާ އިރު، ރިވައިވަލް އެސްސީން ބީއޭއެމްއަށް އަހަރީ މެމްބަރޝިޕް ޕޭމަންޓްގެ ގޮތުގައި 18،000 ރުފިޔާ ދައްކާ ކަމަށާއި ކޯޓު ބުކިންތައް ހިމެނޭ ގޮތަށް އެހެން ހުރިހާ ފައިސާއެއް ކްލަބުން ވަގުތުން ދައްކާ ކަމަށެވެ.
މިދިޔަ އަހަރު ބޭއްވި ގައުމީ ބެޑްމިންޓަން މުބާރާތުގެ ފިރިހެން ސިންގަލްސް، ޑަބަލްސް އަދި މިކްސް ޑަބަލްސްގެ އިތުރުން ރިވައިވަލް އެސްސީން ވަނީ ގިނަ ކާމިޔާބީތަކެއް ހޯދާފައެވެ.
ރިވައިވަލް އެސްސީން ވަނީ ބީއޭއެމްގެ އިންތިޚާބީ މަރުހަލާއަކީ މިހާރުގެ ރައީސަށް މަގާމުގެ މުއްދަތު އިތުރުކުރުމުގެ ވަސީލަތެއް ކަމަށް ތުހުމަތުކޮށް، އެ އެސޯސިއޭޝަނުން އެމަނިކުފާނަށް ތާއީދުކޮށް ވޯޓު ދޭނެ މެމްބަރުންނަށް ދައުވަތު ދީ، ނުދެވިދާނެ ފަރާތްތަކުގެ ހައްގުތައް ނިގުޅައިގެންފައިވާ ކަމަށް ތުހުމަތުކޮށްފައެވެ.
ބެޑްމިންޓަން ޑިވެލޮޕްމަންޓް ސެންޓަރުތަކަށް ވޯޓުލުމުގެ ބާރު ނުލިބޭ ގޮތަށް ހަދާފައިވާ މާއްދާހިމެނޭ ގޮތަށް ބެޑްމިންޓަން އެސޯސިއޭޝަން އޮފް މޯލްޑިވްސްގެ އާޓިކަލް އޮފް އެސޯސިއޭޝަންގެ ބައެއް މާއްދާތަކާ ގުޅިގެން ދާދި ފަހުން ވަނީ އެ އެސޯސިއޭޝަނަށް ބޮޑެތި ފާޑުކިޔުންތަކެއް އަމާޒުވެފައެވެ. އެހެންކަމުން ސްޕޯޓްސް ކޮމިޝަނަރު ވަނީ ބީއޭއެމްގެ އިންތިހާބު ބޭއްވުމުގެ ކުރިން އެ އެސޯސިއޭޝަންގެ މާއްދާ އަށް އިސްލާހު ގެނައުމަށް ވެސް އަންގާފައެވެ.
