Mohamed Shabin IR
6 ވަނަ އޭޝިއަން ކެރަމް ޗެމްޕިއަންޝިޕް މި އޭޕްރީލް މަހު ރާއްޖޭގައި ބާއްވާނެކަން އިއުލާން ކޮށްފި އެވެ.
މިކަން އިއުލާން ކުރެއްވީ މިއަދު ބޭއްވި ނޫސްވެރިންގެ ބައްދަލުވުމެއްގައި ކުޅިވަރާ ބެހޭ ވަޒީރު, އަބްދުالله ރާފިއު އެވެ.
މިނިސްޓަރ ރާފިއު ވިދާޅުވީ އިންޓަނޭޝަނަލް ކެރަމް ފެޑެރޭޝަން (އައިސީއެފް) އިން ވަނީ މުބާާރާތް ރާއްޖޭގައި ކުރިއަށް ގެންދިޔުމަށް ފެހި ސިގްނަލް ދީފައި ކަމަށެވެ.
ހަތް ގައުމާ އެކު މި މަހުގެ 27 ވަނަ ދުވަހު މުބާރާތް ފެށުމަށް ހަމަޖެހިފައިވާއިރު، ފަސް ދުވަހުގެ ނިޔަލަށް މުބާރާތް އޮންނާނީ ސޯޝަލް ސެންޓަރު އެތެރޭ ހޯލުގައި 24 ބޯޑު ބަހައްޓައިގެންނެވެ.
ރާއްޖެ ޓީމުން މިހާރުވެސް ވަނީ މުބާރާތުގެ ތައްޔާރީތަށް ފަށާފަ އެވެ. ދުނިޔޭގެ ރޭންކިންގ ގެ ތިންވަނައިގަ އޮތް ރާއްޖޭގެ ކޯޗަކަށް ކުރީގެ ދުނިޔޭގެ ޗެމްޕިއަނެއް އަންނާނެ ކަމަށާއި، ރޯދަމަސް ނިމޭގޮތަށް ކޯޗު ޓީމާއި ގުޅޭނެކަމަށް ކެރަމް އެސޯސިއޭޝަންގެ ޖެނެރަލް ސެކްރެޓެރީ ހުސެއިން ރައުޝަން ވަނީ ވިދާޅުވެފަ އެވެ.
މިއީ ރާއްޖޭގައި ބާއްވާ މިފަދަ ފުރަތަމަ ކެރަމް މުބާރާތަށް ވާއިރު، ދުނިޔޭގެ ރޭންކިން ގައި ކުރިޔަށް ޖެހިލުމަށް ރާއްޖޭގެ އެތްލީޓުންނަށް މިއީ ރަނުގެ ފުރުސަތެކެވެ. މީގެ ކުރިންވެސް އިންޓަނޭޝަނަލް ލެވެލް ގިނަ މުބާރާތްތަކުގަ އާއި ކެރަމް ވޯލްޑް ކަޕްގައިވެސް ރާއްޖޭގެ އެތްލީޓުން ވަނީ މެޑަލް ހޯދާފަ އެވެ.
