Ahmed Affan
އިންޓަނޭޝަނަލް ކެރަމް ފެޑެރޭޝަން (އައިސީއެފް) ގެ ނައިބު ރައީސްގެ މަގާމަށް ރާއްޖޭގެ ކެރަމް އެސޯސިއޭޝަންގެ ޖެނެރަލް ސެކްރެޓަރީ، ހުސެއިން ރައުޝާން އިންތިހާބުކޮށްފިއެވެ.
ރައުޝާން މިމަގާމަށް އިންތިހާބު ވުމުން، އޭނާ ވެގެންދާނީ ދުނިޔޭގެ ކެރަމްގެ މައި އިދާރާގެ ނައިބުގެ މަގާމު ފުރުއްވާނެ އެންމެ އުމުރުން ހަގު ފަރާތަށެވެ. ނައިބު ރައީސްގެ މަގާމަށް ކުރިއަށް އޮތް ހަތަރު އަހަރަށް ރައުޝަން އިންތިހާބުވީ، އެމެރިކާގެ ސެން ފްރަންސިންސްކޯ، ކެލިފޯނިއާގައި ކުރިއަށްދިޔަ، އިންތިހާބަށް ފަހުއެވެ.
ކެރަމް އެސޯސިއޭޝަންގެ ހިންގުމާ ރއުޝަން ހަވާލުވީ 2019 ވަނަ އަހަރުގެ ތެރޭގައެވެ. ރައުޝާން އަކީ ކުރިން ކެރަމް ކުޅުނު ކުޅުންތެރިއެކެވެ. އޭގެ ފަހުން އޭނާ ވަނީ އަމްޕަޔަރު ކަމުގައި ވެސް މަސައްކަތް ކޮށްފައެވެ. ރާއްޖޭގެ ކެރަމް އެސޯސިއޭޝަންގެ ޖެނެރަލް ސެކްރެޓަރީ ކަމުގެ މަގާމާ ހަވާލު ވުމަށްފަހު ރައުޝާން ވަނީ ބޭރުގެ ކެރަމް އިދާރާތަކާ ވަރުގަދަ ގުޅުމެއް ބާއްވަމުންނެވެ.
2014 ވަނަ އަހަރު ކެރަމް ވޯލްޑް ކަޕް ރާއްޖޭގައި ބޭއްވި އިރު ރައުޝަން އަކީ އެ މުބާރާތުގައި އަމްޕަޔަރެއްގެ ގޮތުގައި މަސައްކަތް ކުރި ފަރާތެކެވެ. ރައުޝަންގެ މި ދައުރުގައި، އޭނާވަނީ ރާއްޖޭގައި ބޭއްވި ދެވަނަ ބައިނަލްއަގުވާމީ މުބާރާތް ރާއްޖެ ގެނެސްދިނުމުގައި އެހީތެރިކަން ފޯރުކޮށްދީފައިވާ ފަރާތެއް ވެސް މެއެވެ. އަދި އެއީ މިދިޔަ 10 އަހަރު ތެރޭ ދެކުނު އޭޝިއާ ގައުމަކުން އޭޝިއާގެ އެންމެ ބޮޑު ކެރަމްގެ މުބާރާތް ބޭއްވި ފަހަރެވެ.
ރައުޝާންގެ އިތުރުން އެކި ކުޅިވަރު ތަކުން ވަނީ ދުނިޔޭގެ ކުޅިވަރު ތަކުގެ އިދާރާތަކުގެ ތަފާތު މަގާމުތައް ވެސް އަދާކޮށްފައެވެ. އެގޮތުން، ވޯލްޑް ބޮޑީބިލްޑިން އެންޑް ފިޒީކް ފެޑެރޭޝަން ނައިބު ރައީސްގެ މަގާމާއި، އިންޓަނޭޝަނަލް ކްރިކެޓް ކައުންސިލް (އައިސީސީ) ގެ ބޯޑުގައި އޭޝިއާ ތަމްސީލްކުރާ މެމްބަރު ކަމުގެ މަގާމުގެ އިތުރުން ބެޑްމިންޓަން ވޯލްޑް ފެޑެރޭޝަންގެ ކައުންސިލް މެމްބަރު ކަމުގެ މަގާމު ވެސް ވަނީ އަދާކޮށްފައެވެ.
