Sidibari
ކ. ގުރައިދޫން 1-0 އިން ފުވައްމުލައް ސިޓީ ބަލިކޮށް ގުރޫޕްގެ އެއްވަނަ ހޯދުމުން, ދެވަނަ ޓީމު ކަނޑައަޅަން ފުވައްމުލަކާއި ތ. ތިމަރަފުށި ގުރުއަތުލާން ޖެހިއްޖެ އެވެ.
ގުރައިދޫ އަތުން ވީ ބައްޔާ އެކު ފުވައްމުލަކުން ދަމަހައްޓަމުން އައި މޮޅު ވުމުގެ ސްޓްރީކު މިވަނީ ގެއްލިފައެވެ. ގުރޫޕު ސްޓޭޖުގައި ފަސް މެޗުން ފަސް މޮޅު ހޯދި ފުވައްމުލަކަކީ ރޭގެ ނިޔަލަށް ގޯލްޑް ކަޕުގައި އެއްވެސް މެޗަކުން ބަލިނުވެ އޮތް ހަމައެކަނި ޓީމެވެ.
ހިލޭ ޖެހުމަކުން ނާއިމް ފޮނުވާލި ބޯޅަ ޑިފެންޑަރެއް ގައިގަ ޖެހިފައި ޝުއޫންއަށް ލިބުމުން، ބޯޅަ ވޮލީ އަކުން ފޮނުވާލީ ފުވައްމުލަކު ގޯލްކީޕަރަށް ސަލާމަތް ނުކުރެވޭހާ ބާރު މިނުގައެވެ. އެއް ލަނޑުން ނަތީޖާ ކަނޑައެޅި މިމެޗަކީ ފުވައްމުލަކުން ގޯލެއް ނުޖެހި ނިންމާލަން ޖެހުނު ފުރަތަމަ މެަޗަށް ވީއިރު، ގުރައިދޫން ވަނީ ހަމަ މި ނަތީޖާއިން ތިމަރަފުށި ވެސް ބަލިކޮށްފަ އެވެ.
ތިމަރަފުއްޓާއި ފުވައްމުލައް ބައްދަލުކުރި މި ގުރޫޕްގެ ފުރަތަމަ މެޗު ނިމުނީ 1-1 އިން އެއްވަރުވެގެންނެވެ.
ގުރޫޕްގެ ދެވަނަ ޓީމުގެ ގޮތުގައި ނައިންޓީ ޕްލަސް ގޯލްޑް ކަޕްގެ ކުއާޓާ ފައިނަލްގެ ޖާގަ ލިބޭނީ އެއް ޕޮއިންޓާ އެކު އޮތް މި ދެ ޓީމުގެ މެދުގައި ގުރުއަތުލައިގެން ދިމާވާ ޓީމަކަށެވެ.
