ބުދަ ދުވަހު ފަށާ ގޯލްޑް ކަޕްގެ ގުރު ނަގައިފި

ނައިންޓީ ޕްލަސް އާއި ސްޕޯޓްސް މިނިސްޓްރީ ގުޅިގެން އަންނަ ބުދަ ދުވަހު ފަށާ ގޯލްޑް ކަޕް ގެ ގުރު ނަގައިފި އެވެ.

މުބާރާތުގައި 22 ޓީމު ބައިވެރިވި ނަމަވެސް، މިރޭ ސިޓްރޮންގައި މުބާރާތުގެ ގުރުއަތުލުން ކުރިއަށް ގެންދިޔައީ 17 ޓީމާ އެކު އެވެ.

މުބާރާތުގައި ބައިވެރިވި ޓީމުތަކުގެ ތެރެއިން ނަން އަނބުރާ ގެންދިޔައީ، ހދ. ނޭކުރެންދޫ، ޅ. ހިންނަވަރު، ފ. ނިލަންދޫ، ގއ. ދެއްވަދޫ އަދި އއ. ތޮއްޑޫ އެވެ.

ޓީމުތައް ހަތަރު ގުރޫޕަކަށް ބަހާލާފައި ވާއިރު، ގުރޫޕް އޭ ފިޔަވައި ތިން ގުރޫޕްގައި ވެސް ހަތަރު ޓީމު ހިމެނެ އެވެ. ގުރޫޕް އޭގައި ހިމެނެނީ ފަސް ޓީމެވެ.

ގުރޫޕް އޭ: ފުވައްމުލައް ސިޓީ – ދ. ކުޑަހުވަދޫ – ގދ. ފަރެސްމާތޮޑާ – ދ. މީދޫ – ހއ. ދިއްދޫ

ގުރޫޕް ބީ: މާލެ ސިޓީ – ތ. ތިމަރަފުށި – ބ. އޭދަފުށި – ބ. ތުޅާދޫ

ގުރޫޕް ސީ: އައްޑޫ ސިޓީ – ޅ. ކުރެންދޫ – ކ. ހުރާ – ކ. ގުރައިދޫ

ގުރޫޕް ޑީ: ޅ. ނައިފަރު – ކ. މާފުށި – ބ. ކެންދޫ – ރ. އަލިފުށި

ގުރޫޕް ސްޓޭޖްގައި ދެ ބުރު!

ގުރޫޕް ސްޓޭޖް ކުރިއަށް ދާނީ ދެ ބުރަކަށެވެ. ދެވަނަ ބުރަށް ދާނީ، ފުރަތަމަ ބުރުގައި، ކޮންމެ ގުރޫޕަކުން ވެސް އެންމެ ރަނގަޅު ތިން ޓީމެވެ.

ނޮކައުޓް ބުރަށް ދާނީ، ގުރޫޕް ސްޓޭޖުގެ ދެވަނަ ބުރުގައި، ކޮންމެ ގުރޫޕަކުން ވެސް އެންމެ ރަނގަޅު ދެ ޓީމެވެ.

ކޮންމެ ގުރޫޕަކުން ވެސް އެންމެ ރަނގަޅު ދެ ޓީމާ އެކު، ޖުމްލަ އަށް ޓީމު ކުއާޓާ ފައިނަލަށް ހޮވޭނެ އެވެ.

މާލޭގެ ގަލޮޅު ރަސްމީ ފުޓްބޯޅަ ދަނޑުގައި، އަންނަ މަހުގެ 25 ގެ ނިޔަލަށް ކުރިއަށް ގެންދާ މި މުބާރާތުގައި ކޮންމެ ޓީމަކަށް ވެސް ރަށުން ބޭރު ދެ ކުޅުންތެރިން ހިމެނުމުގެ ފުރުސަތު އޮތް އިރު، ބައެއް ޓީމުތަކުން ވަނީ ބިދޭސީ ކުޅުންތެރިން ވެސް ހިމަނައިގެން ފަރިތަކުރުންތައް ފަށައިފަ އެވެ.

ފުޓްބޯޅައިގެ ފޯރި އަލުން ގެނައުމުގެ މަގުސަދުގައިކުރިއަށް ގެންދާ މި މުބާރާތް އިންތިޒާމް ކުރާ ނައިންޓީ ޕްލަސްގެ އިސް ފަރާތްތަކުގެ ތެރޭގައި ތަޖުރިބާކާރު ކޯޗުން ކަމަށްވާ މުހައްމަދު ޝާޒްލީ (ޝާޒް) އާއި ކޯޗު އަލީ ނިސްތާރު މުހައްމަދު ހިމެނެ އެވެ.