ކުންފުނިތަކަށް އަމާޒުކޮށްގެން ބާއްވާ އޮފީސް ލީގު އަންނަ އޭޕްރީލް މަހު ފަށަނީ

ޒަމާންތަކެއް ވަންދެން ރިސޯޓު ލީގު އިންތިޒާމުކުރަމުން އަންނަ ފަރާތްކަމުގައިވާ ބިގް ގޭމް މޯލްޑިވްސް އިން އޮފީސް އަދި ކުންފުނިތަކަށް ހާއްސަކޮށްގެން ‘އޮފީސް ލީގު’ ބާއްވަން ހަމަޖައްސައިފި އެވެ.

ފާއިތުވި 12 އަހަރު ތެރޭގައި ކާމިޔާބުކަމާއެކު 50 މުބާރާތް ބާއްވާފައިވާ ބިގް ގޭމް މޯލްޑިވްސް އިން މަޢުލޫމާތު ދީފައިވަނީ 2025 އޭޕްރީލް މަސް ތެރޭގައި ފަށަން ތާވަލުކޮށްފައިވާ އޮފީސް ލީގު ކުރިޔަށްދާނީ މާލެ އަދި ހުޅުމާލޭގަ އެވެ. ސަރުކާރުގެ އިދާރާތައް އަދި ކުންފުނިތަކަށް އަމާޒުކޮށްގެން ބާއްވާ ފުރަތަމަ ‘އޮފީސް ލީގު’ ގެ އެއްވަނަ ޓީމަށް 100،000 ރުފިޔާގެ އިނާމެއް ދިނުމަށް ވަނީ ހަމަޖެހިފަ އެވެ.

ބިގް ގޭމް ގެ ފަރާތުން ސިޑިބަރިއަށް މަޢުލޫމާތުދިން ފަރާތެއް ބުނެފައިވަނީ “އަހަރުތަކެއް ވަންދެން ރިސޯޓުތައް ބައިވެރިކުރުވި ރިސޯޓު ލީގުގެ އިތުރުން، އޮފީސް ލީގާއެކު ‘ކޯޕޮރޭޓް ސެކްޓަރ’ ހިމެނޭ ގޮތަށް މި ކުޅިވަރުގެ ފޯރި ދެމެހެއްޓުމަށް އުއްމީދުކުރަން” ކަމުގައެވެ. އަދި އޮފީސް ލީގު އިފްތިތާހުކުރުމުގެ އަމާޒަކީ “އެކުގައި މަސައްކަތްކުރާ ފަރާތްތަކާ ގުޅުން ބަދަހިކޮށް، ދުވަހުގެ މަސައްކަތުން އަވަދިވެ ލިބޭ ހުސްވަގުތުގެ ބޭނުން ރަނގަޅުގޮތުގައި ހިފުން” ކަމުގައެވެ.

ރާއްޖޭގެ އޮފީސް ފުޓްސަލްގެ ފޯރި އިތުރަށް ގަދަކުރުމުގެ ނިޔަތުގައި މުޅިން އަލަށް ބާއްވާ އޮފީސް ލީގުގެ ފުރަތަމަ މުބާރާތް ފަށަން ހަތަރުވަރަކަށް މަހަށް ވެފައިވާ އިރު، ބިގް ގޭމް އިން ބުނަނީ ކުންފުނިތަކުން މިހާރުވެސް އަންނަނީ ބައިވެރިވުމުގެ ޝައުގު ފާޅު ކުރަމުންނެވެ.