ބައިބަލާގެ ރަސްގެފާނު ބީޖީ ސްޕޯޓްސް އެނބުރި އައިސް ފެންވަރު ދައްކާލައިފި

ބައިބަލާގެ ޗެމްޕިއަންކަން 10 އަހަރު ހޯދާފައިވާ “ބައިބަލާގެ ރަސްގެފާނު” ބީޖީ ސްޕޯޓްސް ކުލަބުން އީދު ބައިބަލާ ޗެލެންޖް 1446 ގައި ކުޅުނު ފުރަތަމަ މެޗު ސީދާ ދެ ގޭމުން ކާމިޔާބުކޮށްފިއެވެ.

ކޮންމެ ފިތުރު ޢީދަކާ ގުޅުވައިގެން ބާއްވަމުން އަންނަ ބައިބަލާ ޗެލެންޖުގައި މިދިޔަ އަހަރު ބީޖީ ސްޕޯޓްސްއިން ވާދަ ނުކުރެ އެވެ. އެއް އަހަރުގެ މެދުކެނޑުމަކަށްފަހު ބީޖީ އެނބުރި އައި މެޗުގައި ނުކުތީ އޮޑި ސްޕޯޓްސް ކުލަބާ ދެކޮޅަށެވެ.

މިއަހަރުގެ މުބާރާތަށް ވަރުގަދައަށް ތައްޔާރުވި އޮޑި ސްޕޯޓްސް ކުލަބާ ވާދަކޮށް ބީޖީ މެޗު ކާމިޔާބުކުރީ ސީދާ ދެ ގޭމުންނެވެ. މެޗުގެ ފުރަތަމަ ގޭމުގައި ބީޖީ ކުޅުނީ ބޭރުންނެވެ. މި ގޭމް 7-5 އިން ބީޖީ ސްޕޯޓްސްއިން ކާމިޔާބުކުރީ ގޭމް ނިމެން ތިން މިނެޓަށްވެފައިވަނިކޮށެވެ. ދެވަނަ ގޭމުގައި އެތެރެއިން ކުޅެ ދެ މިނެޓު ބާކީ އޮއްވާ އޮޑި ސްޕޯޓްސް ކުލަބުގެ ހުރިހާ ކުޅުންތެރިން ނުބައިކޮށް ބީޖީ އިން މި ގޭމް ކާމިޔާބުކުރިއެވެ.

29 ޓީމް ބައިވެރިވި ބައިބަލާ ޗެލެންޖު 1446ގައި މިރޭ ކުޅުނު އެހެން މެޗުތަކަށް ބަލާއިރު، އޮޑި ޓައިޓަންސްގެ މައްޗަށް އެސްޑީޒެޑުން ވަނީ ކާމިޔާބުކޮށްފައެވެ. މި މެޗު އެސްޑީޒެޑުން ކާމިޔާބުކުރީ ސީދާ ދެ ގޭމުންނެވެ.

ކުޑަ ހެންވޭރު ލަޔަންސް އާއި އީގަލްސް އިން އީސީ ވާދަކުރި މެޗު ކުޑަ ހެންވޭރުން ކާމިޔާބުކުރީ ސީދާ ދެ ގޭމުންނެވެ. ޓީނޭޖް ވެޓްރަންސް އަތުން ޓީސީ ސްޕޯޓްސް ކުލަބު މޮޅުވީވެސް ސީދާ ދެ ގޭމުންނެވެ.

މިރޭގެ މެޗުތަކުގެ ތެރެއިން ގަދަ ހިފުމަކަށްދިޔަ ހަމައެކަނި މެޗަކީ ވީކޭ ސްޕޯޓްސް ކުލަބާއި، ލޮރެންޒޯ ސްޕޯޓްސް ކުލަބު ވާދަކުރި މެޗެވެ. މި މެޗު ގަދަ ހިފުމަކަށްގޮސް ކާމިޔާބުކުރީ ލޮރެންޒޯއިންނެވެ.

މިރޭގެ ފަހު ދެ މެޗު ކާމިޔާބުކޮށް ގަދަ 16ގެ ފަހު ދެ ޖާގަ ކަށަވަރުކުރީ ކުލަބު ޓީނޭޖް އާއި ޓީސީ ފްރެޓާނިޓީއެވެ. ބައިބަލާގެ ޗެމްޕިއަންކަން ހަތަރު ފަހަރު ހޯދާފައިވާ ޓީނޭޖުން ވަނީ ސީދާ ދެ ގޭމުން ލޮރެންޒޯ ހޭނާސް ބަލިކޮށްފައެވެ. ޓިސީ ފްރެޓާނިޓީ އިން ވަނީ ސީދާ ދެ ގޭމުން ހައްހާ ވައިކަންމަތި ބަލިކޮށްފައެވެ.