Ismail Azmeen
ސާފިން ގައުމީ ޓީމުތަކުގެ ހެޑް ކޯޗަކަށް ރާއްޖޭގައި އުފެދުނު އެންމެ ކާމިޔާބު ސާފަރު، ހުސައިން އަރީފް (އިބޫ) ހަމަޖައްސައިފި އެވެ.
އަށް ފަހަރު ގައުމީ ޗެމްޕިއަންކަން ހޯދައި ބައިނަލްއަގްވާމީ މެޑަލްތައްވެސް ހޯދާފައިވާ އިބޫ ގައުމީ ޓީމްގެ ކޯޗަކަށް ހަމަޖެއްސިއިރު، އޭނާ ވަނީ މިދިޔަ ގައުމީ މުބާރާތަށްފަހު ރާޅާ އެޅުން ހުއްޓާލަން ނިންމާފަ އެވެ.
ސާފިން ގައުމީ ޓީމްގެ ކޯޗުގެ ގޮތުގައި އެންމެ ފަހުން މަސައްކަތްކުރީ ދެކުނު އެފްރީކާގެ ކްލައިޑް މާޓިން އެވެ. އެއް އަހަރު ގައުމީ ޓީމްގައި މާޓިން ހޭދަކުރި މުއްދަތުގައި އޭނާ ވަނީ މިދިޔަ އަހަރު ކ.ތުލުސްދޫގައި ކުރިއަށްދިޔަ އޭޝިއަން ޗެމްޕިއަންޝިޕްގައި ރާއްޖޭގެ ގައުމީ ޓީމަށް ރަނގަޅު ކާމިޔާބީތަކެއް ހޯދައިދީފަ އެވެ.
މާޓިންގެ ބަދަލުގައި ކޯޗަކަށް ހަމަޖެއްސި އިބޫ އަކީ އެންމެ ފަހުގެ ދިވެހި ސާފް ލީގުގެ ޗެމްޕިއަނެވެ. އޭނާ ވަނީ މިދިޔަ އަހަރު ކުރިއަށްދިޔަ ސާފް ލީގުގެ ހަ މުބާރާތުގެ ތެރެއިން ތިން މުބާރާތުގެ ޗެމްޕިއަންކަން ހޯދާފަ އެވެ.
47 އަހަރުގެ އިބޫ ގައުމީ ޓީމްގެ ކޯޗެއްގެ ގޮތުގައި ކުރިމަތިލާނެ ފުރަތަމަ މުބާރާތަކީ މިއަހަރު ރާއްޖޭގައި ބާއްވާ އޭޝިއަން ސާފިން ޗެމްޕިއަންޝިޕެވެ.
