Ismail Azmeen
ސްވިމިން އެސޯސިއޭޝަން އޮފް މޯލްޑިވްސްގެ ރައީސަކަށް ހަތަރުވަނަ ދައުރަކަށް މުހައްމަދު އަބްދުއްސައްތާރު (ޗަމްޕީ) ކުރިމަތިލައްވައިފި އެވެ.
އަންނަ މަހުގެ އެއްވަނަ ދުވަހު އޮންނަ ސްވިމިން އެސޯސިއޭޝަން އޮފް މޯލްޑިވްސްގެ އިންތިހާބުގައި ރައީސްގެ މަގާމަށް ކުރިމަތިލެއްވީ ސައްތާރު އެކަންޏެވެ. އެހެންކަމުން ހަމައެކަނި ކެންޑިޑޭޓް ހައިސިއްޔަތުން އޭނާއާ މެދު ނަގާނީ ފެންނަ ނުފެންނަ ވޯޓެކެވެ. 2020ގައި އޮތް އެ އެސޯސިއޭޝަންގެ އިންތިހާބުގައިވެސް ނެގީ ފެންނަ ނުފެންނަ ވޯޓެކެވެ.
މޯލްޑިވްސް އޮލިމްޕިކް ކޮމިޓީގެ ރައީސްކަންވެސް ކުރައްވަމުން އަންނަ ސައްތާރު ސްވިމިން އެސޯސިއޭޝަންގެ ރައީސަކަށް މިފަހަރުވެސް ކުރިމަތިލެއްވިއިރު، ނައިބް ރައީސަކަށް ކުރިމަތިލެއްވީ މިހާރުވެސް އެ މަގާމުގައި ހުރި އިސްމާއިލް އަލީ އެވެ. ހަޒާންދާރަކަށް ކުރިމަތިލެއްވީ އަލީ ޝަމީމް އެވެ.
ފަރުދީ މެންބަރުންގެ ތެރޭގައި ހިމެނޭ އަންހެން މެންބަރުކަމަށް ކުރިމަތިލެއްވީ ރަހީމާ އާދަމް އެވެ. ފިރިހެން މެންބަރުކަމަށް ކުރިމަތިލެއްވީ މުހައްމަދު ނައްވާރު އިބްރާހިމް އެވެ. ޓެކްނިކަލް އޮފިޝަލުން ތަމްސީލްކުރާ މެންބަރުކަމަށް ކުރިމަތިލެއްވީ ހަސަން ސިރާރު އެވެ. އަދި ކޯޗުން ތަމްސީލްކުރާ މެންބަރުކަމަށް ކުރިމަތިލެއްވީ އަހުމަދު ފިރާސް އަފީފް އެވެ.
