އޭޝިއަން ކެރަމް ޗެމްޕިއަންޝިޕް: ފިރިހެން ޓީމަށް ރިހި މެޑަލް، އަންހެން ޓީމަށް ލޯ މެޑަލް!

މާލޭގައި މިހާރު ކުރިއަށްދާ އޭޝިއަން ކެރަމް ޗެމްޕިއަންޝިޕުގެ ޓީމު އިވެންޓުން ރާއްޖޭގެ ފިރިހެން ޓީމުން ރިހި މެޑަލް ހޯދިއިރު، އަންހެން ޓީމުން ލޯ މެޑަލް ހޯދައިފިއެވެ.

ހަތް ގައުމާއިއެކު ކުރިއަށްދާ އޭޝިއަން ކެރަމް ޗެމްޕިއަންޝިޕްގެ އެންމެ ފޯރިގަދަ އިވެންޓުކަމަށްވާ ޓީމް އިވެންޓުގެ ރިހި މެޑަލް ދިވެހިރާއްޖޭގެ ފިރިހެން ޓީމަށް ލިބުނީ ފައިނަލުގައި އިންޑިއާ އަތުން ބަލިވުމުންނެވެ. މިއީ ފާއިތުވި 21 އަހަރުގެ ތެރޭގައި ބައިނަލްއަގްވާމީ ކެރަމް މުބާރާތެއްގެ ފައިނަލުން ފިރިހެން ޓީމް ޖާގަ ހޯދި ފުރަތަމަ ފަހަރެވެ.

ގްރޫޕް ސްޓޭޖުގައި  ރާއްޖޭގެ ފިރިހެން ޓީމް ހިމެނުނީ ސިންގަޕޫރު، ކޮރެއާ އަދި ސްރީލަންކާއާއެކު ގްރޫޕް ބީގަ އެވެ. ތިން މެޗުންވެސް މޮޅުވެ ސެމީ ފައިނަލުން ރާއްޖެ ޖާގަ ހޯދިއިރު، ސެމީގައި ނިކުތީ ގްރޫޕް އޭގެ ދެވަނަ ހޯދި ބަންގްލަދޭޝްއާ ދެކޮޅަށެވެ. މި މެޗުން ރާއްޖެ މޮޅުވީ 2-1 އިންނެވެ. ދުނިޔޭގެ ޗެމްޕިއަން އިންޑިއާއާ ދެކޮޅަށް ކުޅުނު ފައިނަލުން ރާއްޖެ ބަލިވީ 3-0 އިންނެވެ.

އޭޝިއަން ޗެމްޕިއަންޝިޕްގައި ފިރިހެން ޓީމުން ރިހި މެޑަލް ހޯދިއިރު، އަންހެން ޓީމުންވަނީ ލޯ މެޑަލް ހޯދާފަ އެވެ. އަންހެން ޓީމަށް ލޯ މެޑަލް ލިބުނީ ސެމީ ފައިނަލުގައި ސްރީލަންކާ އަތުން ބަލިވެ، ތިންވަނަ ހޮވަން ކުޅުނު މެޗުަގައި ބަންގްލަދޭޝް އަތުން މޮޅުވުމުންނެވެ.

އޭޝިއަން ކެރަމް ޗެމްޕިއަންޝިޕުން ރާއްޖޭގެ ފިރިހެން ޓީމާއި އަންހެން ޓީމުން މެޑަލް ހޯދިއިރު، މުބާރާތުގެ ފިރިހެން ޑަބަލްސް ފައިނަލުގައި ވާދަކޮށް ރާއްޖޭގެ އަޒްމީން އާއި ނާނަގެ ޕެއާ ވަނީ ރިހި މެޑަލް ހޯދާފައެވެ.

10 އަހަރުގެ މެދުކެނޑުމަކަށްފަހު އޭޝިއަން ކެރަމް ޗެމްޕިއަންޝިޕް ބާއްވާއިރު، މިފަހަރުގެ މުބާރާތުގައި ރާއްޖެ ހިމެނޭ ގޮތަށް އޭޝިއާ ބައްރުގެ ހަތް ގައުމަކުން 100 އެއްހާ ކުޅުންތެރިން ވާދަކުރެއެވެ.