ރެޕްޓާސް ގެ މުހިންމު ދެ ކުޅުންތެރިން ޓީރެކްސް އަށް

ބާސްކެޓްބޯޅަ ކޮމިއުނިޓީ ސިއްސުވާލުމަށްފަހު ރެޕްޓާސް ބާސްކެޓް ބާސްކެޓްބޯލް ކްލަބް ގެ މުހިންމު ދެ ކުޅުންތެރިން ކަމަށްވާ އައިކް މައުރޫފް އަދި މުހައްމަދު ނާފް ޓީރެކްސް ބާސްކެޓްބޯޅަ ކްލަބަށް ސޮއި ކޮށްފި އެވެ. 

އެންމެ ފަހުން ކުޅުނު ގައުމީ ބާސްކެޓް ލީގުގައި ރެޕްޓާސް ގައި މޮޅަށް ކުޅުނު މި ދެ ކުޅުންތެރިން ޓީރެކްސްއަށް ސޮއިކޮށްފައި ވަނީ އިއްޔެ އެ ކްލަބުން ބޭއްވި ކުޑަ ރަސްމިއްޔާތެއްގަ އެވެ. ޓީރެކްސް ގެ އިސްވެރިން މި ރަސްމިއްޔާތުގައި ވަނީ ބައިވެރި ވެފަ އެވެ. 

ނާފް އަދި އައިކުގެ އިތުރުން ޓީރެކްސް އިން ވަނީ ރެޕްޓާސް ގެ އިތުރު ކުޅުންތެރިއެއް ކަމަށްވާ މުއާން އަދި ކިންގްސް ގެ ކެޕްޓަން ރިޝްފާންގެ ސޮއިވެސް ހޯދާފަ އެވެ. އައިކު، މުއާނު އަދި ނާފް, މި ތިން ކުޅުންތެރިންނަކީ ވެސް ރެޕްޓާސް އިން ކެރިއަރު ފެށި ތިން ކުޅުންތެރިންނެވެ. އަދި ނާފް އާއި އައިކު އަކީ ބާސްކެޓްގެ އުންމީދީ “ޓެގް” އެއް ކަމަށް ގިނަ ފާރާތްތަކުން ބުނަމުން ދެ އެވެ.

ޒުވާން ކުޅުންތެރިން މަދުކަމަށް ފާހަގަ ކުރެވޭ ޓީރެކްސް ގެ ސްކޮޑް އުމުރުގެ ގޮތުން ހަމަ ހަމަ ކުރަމުންދާއިރު، އެހެން ކްލަބް ތަކުންވެސް ދަނީ ޒުވާން ކުޅުންތެރިންގެ ސޮއި ހޯދުމަށް މަސައްކަތް ކުރަމުންނެވެ. މި ޓްރާންސްފާ ތަކާއި އެކު ޓީމުތަކަށް ބޮޑެތި ބަދަލުތަކެއް އަންނާނެ ކަމަށް ބެލެވެ އެވެ.

މި އަހަރުގެ ގައުމީ ލީގު އަދި މުބާރާތުގެ ފިރިހެން ޑިވިޝަން ކާމިޔާބު ކޮށްފައިވަނީ ޓީރެކްސް އިންނެވެ. އަދި މި ދެ މުބާރާތުގެ ފިރިހެން ޑިވިޝަންގެ ދެވަނަ އަށް ދިޔައީ ކިންގްސް އެވެ.