ކާވާ ކްލަބް ޗެމްޕިއަންޝިޕްގެ ތިންވަނަ ހޮވި މެޗުން އެޗްޑީސީ ބަލިވެއްޖެ

ނޭޕާލްގައި ކުރިއަށް ގެންދިޔަ ކާވާ ކްލަބް ޗެމްޕިއަންޝިޕްގެ ތިންވަނަ ހޮވި މެޗުން ރާއްޖޭގެ ކްލަބް އެޗްޑީސީ ބަލިވެއްޖެ އެވެ.

އިއްޔެ ކުޅުނު މެޗުން އެޗްޑީސީ ބަލިވީ އީރާނުގެ ޗަދޯރުމަލޫއާ ވާދަކޮށް ސީދާ ތިން ސެޓުންނެވެ. ސެޓްތައް ނިމުނީ 25-21، 27-25 އަދި 27-25 އިންނެވެ.

ފަސް ޓީމު ވާދަކުރި މި މުބާރާތުގެ ޗެމްޕިއަންކަން ހޯދީ ރޭ ކުޅުނު ފައިނަލްގައި 3-1 ސެޓުން ނޭޕާލްގެ ހެލްޕް ނޭޕާލް ސްޕޯޓްސް ކްލަބް ބަލިކުރި އިންޑިއާގެ ކަލިކަޓް ހީރޯސް އެވެ.

މުބާރާތުގެ ޕްރިލިމިނަރީ ބުރުގެ ފުރަތަމަ މެޗުގައި ރާއްޖޭން ވަނީ 3-2 ސެޓުން ނޭޕާލްގެ ގަންޑާކީ ބަލިކޮށްފަ އެވެ. ނަމަވެސް ދެވަނަ މެޗުގައި ޗަދޯރުމަލޫ އަތުން ވަނީ 3-2 ސެޓުން ބަލިވެފަ އެވެ. ކަލިކަޓް ހީރޯސްއާ ވާދަކުރި މެޗުން ސީދާ ތިން ސެޓުން ބަލިވި އިރު, ހެލްޕް ނޭޕާލާ ދެކޮޅަށް ކުޅެ ބަލިވީ 3-1 ސެޓުންނެވެ.

ގަދަ ހަތަރު ޓީމުގެ މެދުގައި ސެމީ ފައިނަލް ކުޅުނު އިރު, އެޗްޑީސީ ބައްދަލުކުރީ ހެލްޕް ނޭޕާލާ ދެކޮޅަށެވެ. އެ މެޗުން ބަލިވީ ސީދާ ތިން ސެޓުންނެވެ.