ފުވައްމުލަކުން ފޯމު ދަމަހައްޓައި ފަރެސްމާތޮޑާވެސް ބަލިކޮށްފި

ނައިންޓީ ޕްލަސް ގޯލްޑް ކަޕްގައި ގދ. ފަރެސްމާތޮޑާވެސް ބަލިކޮށް ޏ. ފުވައްމުލަކުން މުބާރާތުގައި އެޓީމުގެ ވިދުން ދަމަހައްޓައިފި އެވެ.

މިހާރު ކުރިއަށްދާ ފޯރިގަދަ ފުޓްބޯޅަ މުބާރާތުގެ ފުރަތަމަ ބުރުގައި ފުވައްމުލަކުން ރޭ ފަރެސްމާތޮޑާ އަތުން 5-0 އިން މޮޅުވުމާއިއެކު އެޓީމަށް ވަނީ 12 ޕޮއިންޓް ލިބިފަ އެވެ. ކުޅުނު ހަތަރު މެޗުވެސް ކާމިޔާބުކޮށް އެޓީމުން ސައްތައިން ސައްތަ ރެކޯޑު ދެމެހެއްޓިއިރު، އެޓީމުން ވަނީ 19 ގޯލު ޖަހާފަ އެވެ. މިހާތަނަށް މުބާރާތުގައި އެންމެ ގިނަ ގޯލު ޖެހި ޓީމަކީވެސް ފުވައްމުލަކެވެ.

ރޭގެ މެޗުގައިވެސް ފުވައްމުލަކުގެ ތަރިއަކަށްވީ އެޓީމްގެ ގާނާ ފޯވާޑް ކޮފީ އޮފޫސޫ އެވެ. އޭނާ ތިން ގޯލު ޖަހައި ހެޓްރިކެއް ހެދިއިރު، ފުވައްމުލަކުގެ މުހައްމަދު އިޔާޝް އަހުމަދުވެސް ގޯލެއް ޖެހި އެވެ. އަނެއް ގޯލަކީ ފަރެސްމާތޮޑާ ކުޅުންތެރިއެއް އަތުން ބައިކޮޅަށް ވަތް ގޯލެކެވެ.

ފުވައްމުލަކާއި ފަރެސްމާތޮޑާ ހިމެނޭ ގްރޫޕް އޭ އިން އެއްވަނަ ހޯދައި ފުވައްމުލަކުން ދެވަނަ ބުރުގެ ޖާގަ ޔަގީންކޮށްފައިވާއިރު، މި ގްރޫޕުން ދެވަނަ ބުރުގެ ޖާގަ ހޯދަން ތިން ޓީމަކަށްފުރުސަތު އެބައޮތެވެ. އެއީ ގްރޫޕް އޭގެ ދެ ވަނައިގައި އޮތް ދިއްދޫ އާއި ތިން ވަނައިގައި އޮތް ދ. މީދު އަދި ހަތަރެއްގައި އޮތް ކުޑަހުވަދޫ އެވެ. މި ތިން ޓީމަށްވެސް ލިބިފައިވަނީ ތިން ޕޮއިންޓެވެ.

މިހާތަނަށް ނައިންޓީ ޕްލަސް ގޯލްޑް ކަޕްގެ ދެވަނަ ބުރުން 10 ޓީމެއްވަނީ ޖާގަ ހޯދާފަ އެވެ. އެއީ އައްޑޫ ސިޓީ، ކ. ގުރައިދޫ، ޅ.ކުރެންދޫ، ފުވައްމުލައް ސިޓީ، ބ. އޭދަފުށި، މާލެ ސިޓީ، ކ. މާފުށި، ޅ. ނައިފަރު، ރ. އަލިފުށި އަދި ތ. ތިމަރަފުއްޓެވެ.

ދެވަނަ ބުރުގެ މެޗުތައް ކުރިއަށްދާނީ 12 ޓީމް ހަތަރު ގްރޫޕަކަށް ބަހާލައިގެންނެވެ. ނޮކްއައުޓްބުރުން ފުރުސަތު ލިބޭނީ ކޮންމެ ގްރޫޕެއްގެ ގަދަ ދެ ޓީމަށެވެ.