Ali Thameem
ބޮޓްސްވާނާ އިންޓަނޭޝަނަލްގެ އަންހެން ސިންގަލްސްގެ ޗެމްޕިއަންކަން ފާތުމަތު ނަބާހާ ހޯދީ ފައިނަލުގައި އޭނާގެ ރިވައިވަލްސް އެސްސީގެ ޓީމްމޭޓް އަދި ކޮއްކޮ އާމިނަތު ނަބީހާ ބަލިކުރުމަށް ފަހު އެވެ.
އެއާއެކު ނަބާހާ ވެފައިވަނީ ބީ.ޑަބްލިއު.އެފުން ހުއްދަ ދީފައިވާ މުބާރާތަކުން ސިންގަލްސް ރަން މެޑަލް ހޯދި ފުރަތަމަ ދިވެހި ކުޅުންތެރިޔާއަށެވެ. މިއީ ސިންގަލްސް ފައިނަލަށް ދިވެއްސަކު ކޮލިފައިވި ފުރަތަމަ ފަހަރެވެ. އެހެންކަމުން ބޮޓްސްވާނާ އިންޓަނޭޝަނަލްގެ ސިންގަލްސް ފައިނަލުގައި ކުޅުމަށް ފަހު ނަބާހާ އާއި ނަބީހާ ވެސް މިއަދު ވަނީ ތާރީހުން ޖާގަ ހޯދާފައެވެ.
ނަބީ އަދި ނަބާ ވާދަކުރި ފައިނަލް މެޗު ނަބާ ކުރި ތިން ސެޓު ކުޅެގެންނެވެ. އެއީ 22-20، 14-21، 21-15 އިންނެވެ. މި ތިން ސެޓު ވެސް ނިންމީ ކްލޯޒް ކޯލްތަކަށެވެ. ވާދަވެރި ކުޅުމެއް ފެނިގެން ދިޔަ މި މެޗުގެ އެއް ސެޓު ނަބާ ކާމިޔާބު ކޮށްފައިވަނީ ދެ ޕޮއިންޓްގެ ތަފާތުންނެވެ.
މި މުބާރާތުގެ ސެމީފައިނަލުތައްވެސް ކުޅެފައިވަނީ އިއްޔެ އެވެ. މިގޮތުން ސެމީ ފައިނަލުގައި ނަބީހާ އަދި ނަބާހާ އަށް ވެސް ކުރިމަތިލާން ޖެހުނީ އަޒަރުބައިޖާންގެ ކުޅުންތެރިންނާ އެވެ. ނަބީހާ ސެމީ ފައިނަލުގައި ވާދަކުރީ އަންހެން ކުޅުންތެރިންގެ އެންމެ މަތީ ރޭންކިންގެ ތެރޭގައި ހިމެނޭ އެއް ކުޅުންތެރިޔާ އެރާ މަފުތޫހާ އާއެވެ. އެއީ މި މުބާރާތުގައި ނަބާހާގެ ފަހަތުން ދެވަނަ ސީޑް ލިބިފައިވާ ކުޅުންތެރިޔާ އެވެ. ނަމަވެސް ނަބީހާ ވަނީ ދެ ސެޓު އެއް ސެޓުން މެޗު ކާމިޔާބުކޮށްފަ އެވެ.
މުބާރާތުގެ އެއްވަނަ އަށް ސީޑްކޮށްފައިވާ އަންހެން ކުޅުންތެރިޔާ ނަބާހާ އަށް ސިންގަލްސް ސެމީ ފައިނަލުގައި ވާދަކުރަން ޖެހުނީ އަޒަރުބައިޖާންގެ ހާޖަރު ނޫރިޔޭވާއާ ދެކޮޅަށެވެ. މި މެޗު ނަބާހާ ކާމިޔާބުކުރީ ސީދާ ދެ ސެޓުންނެވެ.
ބޮޓްސްވާނާ އިންޓަނޭޝަނަލް އަކީ ރިވައިވަލް އެސްސީގެ ކުޅުންތެރިން ކަމަށްވާ ނިބާލް އަހުމަދާއި ޒަޔާން ޒަކީ އަދި ދެ ބެއިން މި އަހަރުގެ ނޮވެމްބަރު މަހު އެފްރިކާގައި ބައިވެރިވި ދެވަނަ މުބާރާތެވެ. މި މަހުގެ ކުރީކޮޅު ޒެމްބިއާ އިންޓަނޭޝަނަލްގައި އެ ޓީމުން ކުޅުނު އިރު، އަންހެން ޑަބަލްސް އިން ނަބާހާ އާއި ނަބީހާ ވަނީ ރަން މެޑަލް ހޯދައިފަ އެވެ.
