Ali Thameem
ހުޅުމާލެ ފޭސް 2 ގައި ކުޅުނު ވެސްޓް އެންޑް ފުޓްސަލް މުބާރާތުގައި ރޭގެ ފޯރިގަދަ ފައިނަލް މެޗުގައި އާރުޑީއެލްގެ މައްޗަށް ކުރިހޯދައި ގޯޓް އެސް ސީ ޗެމްޕިއަންކަން ކޮށްފިއެވެ.
މެޗުގެ ފުރަތަމަ ގޯލު 19 ވަނަ މިނެޓުގައި ގޯޓު އެސްސީއަށް ޖަހައިދީފައިވަނީ އަޙްމަދު މުނީޒު (ޓްރީ)ގެ އެސިސްޓަކުން އިބްރާހީމް ސިނާހު (ސިނާ) އެވެ. އޭގެ ދިހަ މިނެޓު ފަހުން އާރުޑީއެލް ނަތީޖާ އެއްވަރު ކުރީ އަހުމަދު އަމްނު ގެ ލަނޑަކުންނެވެ. އެސިސްޓު ކޮށްދީފައިވަނީ މާއިޝް ރަޝީދެވެ. އާރުޑީއެލް އިން އޭގެ ދެމިނެޓު ފަހުން ގޯލެއްޖަހައި ކުރިހޯދީ ހާޒިމް ފައުޒީ ގެ އެސިސްޓަކުން ހަމްދޫން ފޮނުވާލި ބޯޅަ އަކުންނެވެ. ގޯޓުން ނަތީޖާ އެއްވަރުކުރީ މެޗުގެ ފުރިހަމަ ވަގުތު ހަމަވާން ދެމިނެޓަށް ވެފައިވަނިކޮށް އަލީ ޝިޔާހުގެ އެސިސްޓަކުން މުނީޒު ޖަހައިދިން ގޯލުންނެވެ.
ޕެނަލްޓީ ޝޫޓައުޓުގައި ގޯޓުގެ ތިން ޕެނަލްޓީވެސް ކާމިޔާބު ކުރި އިރު، އާރުޑީއެލްގެ އެއް ޕެނަލްޓީ ދިޔައީ ގޯލު ދަނޑީ ޖެހިފައި ބޭރަށެވެ. ބެންޗުން އެރި ގޯލްކީޕަރު ވިޝާން (ވިތަޅޭ) އަނެއް ދެ ޕެނަލްޓީ މަތަކޮށް ލިބުނު މޮޅާއެކު،ފުރަތަމަ ވެސްޓް އެންޑް މުބާރާތުގެ ތަށި އުފުލާލީ ގޯޓު ސްޕޯޓްސް ކުލަބުންނެވެ.
މި މޮޅާއެކު، ގޯޓު އެސްސީ މި މުބާރާތުގެ ނޮކައުޓު ސްޓޭޖުގެ ހުރިހާ މޮޅެއްވެސް ވެފައި މި ވަނީ ޕެނަލްޓީ ޖަހައިގެންނެވެ.
އާރުޑީއެލް ފައިނަލުން ޖާގަ ހޯދީ ސެމީ މެޗުގައި ‘ޖޭކޭ ސްޕޯޓްސް’ ކުލަބާ އެއްވަރުވެ، ޕެނަލްޓީ އިން ކުރިހޯދައިގެނެވެ. އަދި ގޯޓު އެސް ސީ ސެމީގައި ކުޅެ މޮޅުވީ ‘ފައިގަތަޅާ’ އަތުން ނެވެ.
އަށް ގުރޫޕުގެ މައްޗަށް އެކުލެވޭ މި މުބާރާތުގައި ބައްތިރީސް ޓީމު ވާދަކޮށް ޖުމްލަ 63 މެޗު ވަނީ ކުޅެފައެވެ.
މި މުބާރާތުގެ އެންމެ މޮޅު ފަސް ކުޅުންތެރިންނަށް ހޮވިފައިވަނީ އާރުޑީއެލްގެ ހާޒިމް ފައުޒީ އަދި އިބްރާހީމް އަޒްލީމްގެ އިތުރުން ގޯޓް އެސްސީގެ އަހުނަފް ރަޝީދު އާއި އިޔާދު އަލީގެ އިތުރުން ޖޭކޭ އެސްސީގެ އަރީން އަބްުދުﷲ އެވެ. އެންމެ ގިނަ ލަނޑުޖެހި ކުޅުންތެރިޔަކީ ކޭއެފްޓީގެ އަހްމަދު ހަމްދާނެވެ. އަދި ފެއާޕްލޭ ޓީމަކަށް ހޮވިފައިވަނީ ‘އުރަގަން’ އެވެ. މޮޅު ކޯޗަކަށް ގޯޓުގެ ނައުފަލް މުހައްމަދު ހޮވުނުއިރު، މުބާރާތުގެ އެންމެ މޮޅު ކުޅުންތެރިޔާގެ ލަޤަބު ހާސިލްކުރީ އެޓީމުގެ އިސްމާއިލް ވަޖީހް (ވައްޖެ) އެވެ.
ވެސްޓް އެންޑް ފުޓްސަލް މުބާރާތަކީ ‘ވެސްޓެ އެންޑް ސްޕޯޓްސް’ ކުލަބުން އިންތިޒާމުކޮށް، ‘އެޗު.ޑީ.ސީ’ އާ ގުޅިގެން މުޅިން އަލަށް ކުރިޔަށް ގެންދިޔަ މުބާރާތެކެވެ. މި މުބާރާތަކީ ހުޅުމާލެ ފޭސް 2 ފުޓްސަލް ދަނޑުތަކުގައި މިފަދައިން އިންތިޒާމުކޮށްގެން ބާއްވާ ފުރަތަމަ މުބާރާތް ވެސްމެ އެވެ. މި މުބާރާތުގެ މީޑިޔާ ޕާޓުނަރަކީ ސިޑިބަރިއެވެ.
