ގޯލްޑް ކަޕާ އެކު އަތޮޅު ފުޓްބޯޅަ އަލުން ގަލޮޅު ދަނޑަށް!

ފުވައްމުލައް ސިޓީ އާއި ދ. ކުޑަހުވަދޫ ބައްދަލުކުރި ފޯރިގަދަ މެޗުން، އަތޮޅު ފުޓްބޯޅައިގެ ވާދަވެރިކަން އަލުން ގެނައުމުގެ މަގުސަދުގައި މުޅިން އަލަށް ބާއްވާ ނައިންޓީ ޕްލަސް ގޯލްޑް ކަޕް 2024 ގަލޮޅު ދަނޑުގައި މިރޭ ފަށައިފި އެވެ.

މިރޭގެ މެޗު، ނުވަ ކުޅުންތެރިންނާ އެކު ނިންމާލި ކުޑަހުވަދޫގެ މައްޗަށް ފުވައްމުލައް ކުރިހޯދީ 3-1 އިންނެވެ.

ކުދަހުވަދޫން ދެ ކުޅުންތެރިން މަދުވީ އެޓީމުގެ އަހުމަދު ރިލްވާން (ބެން) އާއި ހަސަން ސާއިފް އަށް ދެވަނަ ރީނދޫ ކާޑާ އެކު ރަތް ކާޑު ދެއްކުމާ ގުޅިގެންނެވެ. ބެން އަށް ރަތް ކާޑު ދެއްކީ ފުވައްމުލަކު ކީޕަރަށް ފައުލް ކުރުމުންނެވެ. ސާއިފް އަށް ރަތްކާޑު ދެއްކީ، މިއާ ގުޅިގެން އުފެދުނު ހަމަނުޖެހުމުގައި އިދިކޮޅު ކުޅުންތެރިއަކު ކޮއްޕާލުމުންނެވެ.

ފުވައްމުލަކުން ވަނީ މެޗުގެ 38 ވަނަ މިނިޓުގައި ކޯފީ އޮވޫސޫ ޖަހައިދިން ގޯލުން ލީޑުނަގައިފަ އެވެ. ކޯފީ ވަނީ ފާއިތުވި ދެ ސީޒަންގެ ދެވަނަ ޑިވިޝަން ގައި ނިއު ރޭޑިއަންޓަށް ކުޅެފަ އެވެ.

ކުޑަހުވަދޫ އިން ވަނީ 68 ވަނަ މިނިޓުގައި ނަތީޖާ އެއްވަރު ކޮށްފަ އެވެ. ކުޑަހުވަދޫގެ ގޯލު ޖަހައިދިނީ އަހުމަދު މުއާދު އެވެ.

ފުވައްމުލައް މޮޅުވީ މެޗުގެ އެންމެ ފަހު ވަގުތު ކާމިޔާބުކުރި ގޯލުތަކުންނެވެ. މެޗުގެ 89 ވަނަ މިނިޓުގައި ފުވައްމުލަކަށް އަލުން ލީޑު ނަގައިދިނީ ގައުމީ ޓީމަށް ވެސް ކުޅުނު އަލީ ޝަމާލް އަބްދުﷲ އެވެ. އަދި އިތުރު ވަގުތުގެ ނުވަވަނަ މިނިޓުގައި އެޓީމުން ތިން ޕޮއިންޓް ޔަގީން ކުރީ މޫސާ އަޒީމް ހަސަން ޖަހައިދިން ގޯލުންނެވެ.

މެޗުގެ މޮޅު ކުޅުންތެރިއަކަށް ހޮވުނީ ދިވެހި ޕްރިމިއާ ލީގުގެ ޔުނައިޓެޑް ވިކްޓަރީ (ޔޫވީ) އަށް ވެސް ކުޅެމުން އަންނަ އަޒީމް އެވެ.

ގޯލްޑް ކަޕްގައި 17 ޓީމު ވާދަކުރާއިރު، ޓީމުތައް ވަނީ ހަތަރު ގުރޫޕަކަށް ބަހާލައިފަ އެވެ. ފުވައްމުލަކާއި ކުޑަހުވަދޫ ހިމެނެނީ ގުރޫޕް އޭގަ އެވެ. މި ގުރޫޕްގައި ދެން ހިމެނެނީ ގދ. ފަރެސްމާތޮޑާ އާއި ދ. މީދޫ އަދި ހއ. ދިއްދޫ އެވެ.

މުބާރާތުގައި މާދަމާ ދެ މެޗު ކުޅުމަށް ހަމަޖެހިފައި ވާއިރު، ހަވީރު 4:00 ގައި ބައްދަލުކުރާނީ ފަރެސްމާތޮޑާ އާއި ދިއްދޫ އެވެ. އަދި ރޭގަނޑު 9:00 ގައި ކުޅޭ މެޗުގައި ބައްދަލުކުރާނީ ގުރޫޕް ބީގެ މާލެ ސިޓީ އާއި ތ. ތިމަރަފުއްޓެވެ.

މުބާރާތުގެ ހުރިހާ މެޗެއް ވެސް ކުޅޭނީ ގަލޮޅު ދަނޑުގަ އެވެ.

މިއީ 2019-2020 ސީޒަނަށް ފަހު އަތޮޅުތެރޭ ޓީމެއް ގަލޮޅު ދަނޑުގައި ކުޅުނު ފުރަތަމަ ފަހަރެވެ. އެ ސީޒަންގައި ށ. ފޯކައިދޫ އާއި ފ. ނިލަންދޫ ވަނީ ދިވެހި ޕްރިމިއާ ލީގުގައި ކުޅެފަ އެވެ. ނަމަވެސް އަތޮޅު ތެރޭ ޓީމުތަކަށް ބާއްވާ މިނިވަން ޗެމްޕިއަންޝިޕް ހުއްޓާލުމާ އެކު، އޭގެ ފަހުން އަތޮޅުތެރޭ ޓީމުތަކަށް ގަލޮޅު ދަނޑުގައި ގައުމީ ފެންވަރެއްގައި ވާދަކޮށްލުމުގެ ފުރުސަތު އޮތީ ނުލިބި އެވެ.

ކުޑަހުވަދޫ ވަނީ 2017 ވަނަ އަހަރު ގަލޮޅު ދަނޑުގައި ކުޅުނު މިނިވަން ޗެމްޕިއަންޝިޕްގެ ތަށި އުފުލާލައި، އެ އަހަރު އޮތް ދިވެހި ޕްރިމިއާ ލީގުގައި ވެސް ކުޅެފަ އެވެ.

ދިވެހި ޕްރިމިއާ ލީގު 2023-2024 ކޮލިލފައިން ނަމުގައި 2022 ވަނަ އަހަރު ޑިވިޝަންތަކަކަށް ބަހާލައިގެން މުޅި ރާއްޖެއަށް ހުޅުވާލައިގެން މުބާރާތެއް ފެށި ނަމަވެސް، އެފްއޭއެމްގެ ފައިސާގެ މައްސަލަތަކާ ގުޅިގެން މުބާރާތް ކުރިއަށް ނުގެންދެވި، ވަކި ހިސާބަކުން ޖެހުނީ ހުއްޓާލާށެވެ.