Ansar Ibrahim
ސްރީލަންކާގައި ދިރިއުޅެމުން އަންނަ ދިވެހިންނަށް އަމާޒު ކޮށްގެން “ކޮޅުނބު ފުޓްސަލް ކަޕް 2024” ނަމުގައި އިންތިޒާމުކުރާ މުބާރާތް އަންނަ އާދިއްތަ ދުވަހު ފަށަން ތައްޔާރުވެއްޖެ އެވެ.
ދިވެހިންނަށް ހާއްސަކޮށްގެން ދިވެހި ސަރުކާރުން ގާއިމުކޮށް ހިންގަމުން އަންނަ މޯލްޑިވިއަން އެޑިޔުކޭޝަނަލް އެންޑް ކަލްޗަރަލް ސެންޓަރ (އެމްއީސީސީ) ނުވަތަ ސޯސަންވިލާގައި ވަން ޑޭ ކަޕެއްގެ ގޮތުގައި ކުރިއަށް ގެންދާ މި މުބާރާތުގައި ޖުމްލަ 8 ޓީމު ބައިވެރިވެފައިވެ އެވެ.
މި މުބާރާތަކީ ސޯސަންވިލާއާ ގުޅިގެން، 4 މީހުންގެ މައްޗަށް އެކުލެވޭ ޓީމަކުން ރާވާ އިންތިޒާމްކޮށްގެން ބާއްވާ މުބާރާތެކެވެ. މުބާރާތް އިންތިޒާމްކުރާ ފަރާތުން ބުނެފައިވަނީ، މި މުބާރާތަކީ ފުޓްސަލް މުބާރަތަކަށް ވުރެ ބޮޑަށް ފުޓްބޯޅަ ފިއެސްޓާ އެއް ގޮތަށް ކުރިއަށް ގެންދިއުމަށް ހަމަޖެހިފައިވާ މުބާރާތެކެވެ. އަދި ލަންކާ އަކީ ގިނަ ދިވެހިން ދިރިއުޅެމުންދާ ތަނަކަށް ވުމާއި، ދިވެހިން ގިނަގިނައިން ޒިޔާރާތް ކުރާ ގައުމަކަށް ވެފައި، ދިވެހިންގެ މެދުގައި އެކުވެރިކަމާއި އެއްބައިވަންތަކަން އާލާކޮށް، ލަންކާގައި އުޅޭ ރާއްޖޭގެ ކޮމިއުނިޓީ އެންމެން އެއްތަނަކަށް އެއްވެ އެކަކު އަނެކަކާ އޮންނަ ގުޅުން އިތުރަށް ބަދަހިކޮށް ވަރުގަދަ ކުރުމަކީ މި މުބާރާތް ބޭއްވުމުގެ މަގުސަދެއް ކަމަށެވެ.
މިއީ، ކޮންމެ އަހަރަކު ވެސް ކުރިއަށް ގެންދިއުމަށް އަމާޒު ހިފައިގެން، އިންތިޒާމް ކޮށްގެން ބާއްވާ މި ސީރީޒްގެ ފުރަތަމަ މުބާރާތެވެ.
މުބާރާތް އިންތިޒާމްކޮށް ކުރިއަށް ގެންދިއުމުގައި ފަސްޓް ސެކްރެޓަރީ އަލީ ސީޒަން އާއި އަދި ސޯސަންވިލާގެ އެންމެހާ މުވައްޒަފުންގެ ފަރާތުން ބޮޑު އެއްބާރުލުމެއް ލިބޭ ކަން އިންތިޒާމް ކުރާ ފަރާތުން ފާހަގަ ކުރެއްވިއެވެ.
މިއަހަރުގެ މުބާރާތުގެ މެއިން ސްޕޮންސަރުގެ ގޮތުގައި ސްވިފްޓް ލޮޖިސްޓިކް ހަމަޖައްސާފައިވާއިރު، އިވެންޓް ޕާޓްނަރަކީ އެސްޕަޔާ އެކަޑެމީއެވެ. ފިޓްނަސް ޕާޓްނަރަކަށް ބޮޑީ ޓޯންސް ހަމަޖައްސާފައިވާއިރު، މީޑިއާ ޕާޓްނަރަކީ ސިޑިބަރިއެވެ.
މުބާރާތުގެ ކޯ ސްޕޮންސަރުންނަކީ އައިލެންޑް ޕާފިއުމް، އެމް.އެން މޯލްޑިވްސް، ކެފޭ ޑި މާލެ، ދަ ހޯކްސް ޕްރައިވެޓް ލިމިޓެޑް، އޮބިއަން، ސެރެސް ހާވެސްޓް، ފަހާމާސް، އެއިންޒް ކިޗަން، ގުރުވަ އަދި ޕްރިންޓް ހައުސް އެވެ.
