Ansar Ibrahim
ކެލިފޯނިއާގެ ސެން ފްރެންސިސްކޯގައި މިހާރު ކުރިއަށްދާ ހަ ވަނަ ކެރަމް ވޯލްޑް ކަޕްގެ ފިރިހެން އަދި އަންހެން ޓީމު އިވެންޓުން ވެސް ރާއްޖެ އިން ލޯ މެޑަލް ހޯދައިފިއެވެ.
ތިން ވަނަ އަށް ދިޔަ ޕްލޭއޮފްގައި ރާއްޖެ ވަނީ ސްރީލަންކާ ޓީމުގެ މައްޗަށް ކުރިހޯދާފައެވެ. ޓީމް އިވެންޓުގެ އަންހެން ބައިގައި ރާއްޖެ ތަމްސީލުކުރި ހަތަރު ކުޅުންތެރިންނަކީ އާމިނަތު ވިދާދު، އައިޝަތު ނަހުފާ، އައިޝަތު ފައިނާޒް އަދި ފާތިމަތު ރަޔާނާ އެވެ. ފިރިހެން ބައިގައި ރާއްޖެ ތަމްސީލު ކުރި ހަތަރު ކުޅުންތެރިންނަކީ ހަސަން ނާޒިމް، އިސްމާއިލް އަޒްމީން، އިބްރާހިމް ހުޖާން އަލީ އަދި މުހައްމަދު މުންތަސިރެވެ.
ރާއްޖޭގެ ކޮންޓިންޖެންޓްގައި ހިމެނޭ އަނެއް ހަތަރު ކުޅުންތެރިން ކަމަށްވާ, ޝުބާ، ޔަމާން، ހާތިމް އަދި ލިފާއު އަންނަނީ ސްވިސް ލީގުގައި ކުޅެމުންނެވެ.
މި މެޗުތައް ކުޅެފައިވަނީ ބެސްޓް އޮފް ތްރީ ފޯމެޓަށެވެ. މެޗުން މޮޅުވާ ޓީމެއް ކަނޑައަޅާނީ މެޗުގެ ތިން ސަބް މެޗުގެ ތެރެއިން ދެ މެޗުން މޮޅުވާ ޓީމަކުންނެވެ. ޓީމް އިވެންޓުގައި ކޮންމެ މެޗެއްގައި ވެސް ސިންގަލްސް ދެ މެޗާއި ޑަބަލްސް އެއް މެޗު ހިމެނެއެވެ.
ޓީމް އިވެންޓްގެ ފައިނަލް އިއްޔެ ކުރިއަށް ދިޔައިރު، އަންހެން އަދި ފިރިހެން ޑިވިޝަންގެ ސިންގަލްސް ފައިނަލްތައް މިއަދު ކުޅޭނެއެވެ. އަދި މުބާރާތް ނިންމުމުގެ ރަސްމިއްޔާތު ވެސް މިރޭ އޮންނާނެއެވެ.
ވޯލްޑް ކަޕްގެ ފުރަތަމަ ދުވަހު އަންހެން އަދި ފިރިހެން ޑަބަލްސް އިވެންޓުގެ ކުއާޓާ ފައިނަލުން ރާއްޖެ ޖާގަ ހޯދި ނަމަވެސް ސެމީއަށް ދެވޭ ގޮތްވަނީ ނުވެފައެވެ.
ހަ ވަނަ ކެރަމް ވޯލްޑް ކަޕް, އެމެރިކާގެ ކެރަމް އެސޯސިއޭޝަނުން މި އަހަރު އިންތިޒާމުކޮށްގެން ބާއްވަނީ ކެލިފޯނިއާގެ ސެން ފްރެންސިސްކޯ ބޭ އޭރިއާގައެވެ. ރާއްޖޭގެ ކެރަމް ޓީމް އެމެރިކާއަށް ފުރާފައިވަނީ މި މަހުގެ އަށްވަނަ ދުވަހުއެވެ.
