ނިއުގެ ކޮންގްރެސް އަންނަ ބުދަ ދުވަހު

ރާއްޖޭގެ އެންމެ ކާމިޔާބު އެއް ކްލަބް ކަމަށްވާ ނިއު ރޭޑިއަންޓްސް ސްޕޯޓްސް ކްލަބްގެ ކޮންގްރެސް އަންނަ ބުދަ ދުވަހު ބޭއްވުމަށް ވަނީ ހަމަޖެހިފަ އެވެ.

ނިއު އިން މި މަހު 20 ވަނަ ދުވަހު އެ ކްލަބްގެ ކޮންގްރެސް ބާއްވަން ނިންމާފައި ވާއިރު އެ ކްލަބްގެ ހުސްވެފައިވާ ޗެއާމަން ކަމުގެ މަގާމަށް ދެ ބޭފެޅަކު ވަނީ ޝައުގުވެރިކަން ފާޅުކުރައްވާފައެވެ. އެއީ އަހުމަދު މުބީން އާއި އަލީ ވަހީދު (ބަލަކް) އެވެ. މި ދެ ބޭފުޅުންނަކީ ވެސް މީގެ ކުރިން ރައްޔިތުންގެ މަޖިލީހުގެ މެންބަރުކަން ކުރައްވާފައިވާ ދެ ބޭފުޅުންނެވެ. މީގެ އިތުރުން ބަލަކް ވަނީ މީގެ ކުރިން ނިއުގެ ޗެއާމަންގެ ގޮތުގައި ކާމިޔާބު ދުވަސްތަކެއް ހޭދަ ކުރައްވައިފަ އެވެ.

ރީޖަނަލް އެއާޕޯޓްސްގެ މެނޭޖިންގް ޑިރެކްޓަރު ކަމުގެ މަގާމުގައި ހުންނެވި މުބީން ވަނީ ސޯޝަލް މީޑީއަގައި މި މަގާމަށް ޝައުގުވެރިކަން ފާޅުކުރައްވާފައެވެ. އެކަން އަންގައިދެމުން ކުރި ޕޯސްޓެއްގައި މުބީން ވިދާޅުވީ، “މާތް الله ގެ ވާގިފުޅާ އެކު މި ފަށާ ދަތުރުގައި ދިވެހިރާއްޖޭގެ އެންމެ ސަޕޯޓަރުން ގިނަ ކްލަބް އަލުން އަނބުރާ އިހު އޮތް މަގާމަށް ގެނެސް ނިއުގެ ސަޕޯޓަރުން ހެއްވާލަ ދޭނަން.” ކަމަށެވެ.

މީގެ އިތުރުން ބަލަކް ވެސް ވަނީ ނިއުގެ އެންމެ ފަހުން ހުރި ޗެއާމަން އިސްތިއުފާ ދިނުމުން އެއާ ގުޅުވައި ޕޯސްޓެއް ކުރައްވާފަ އެވެ. މިއަހަރުގެ ކުރީކޮޅު ކުރެއްވި ޕޯސްޓުގައި ބަލަކް ވިދާޅުވެފައިވަނީ އެނބުރި އަންނާނީ ވަރުގަދަކޮށް ކަމަށެވެ.

ކުޅުންތެރިނަން މުސާރަ ނުދޭ ބޮޑު މައްސަލަ ގަނޑެއްގައި ނިއުރޭޑިއަންޓް އޮއްވައި، އޭރު އެފްއޭއެމްގެ ރައީސް ބައްސާމް އަދީލް ޖަލީލާ ދެކޮޅަށް އިތުބާރު ނެތްކަމުގެ މައްސަލައެއް ހުށަހެޅުމުގެމަސައްކަތް ނިއު އިން ފެށުމުން، 2019 ވަނަ އަހަރު އެފްއޭއެމް އިން ވަނީ ނިއު ސަސްޕެންޑް ކޮށްފަ އެވެ.

އަދި 2022 ވަނަ އަހަރު، ނިއުގެ ސަޕޯޓަރުންނާއި ފަހުން އައްޔަނުކުރެވުނު ޗެއާމަން އަހުމަދު ވާސިފްގެ މަސައްކަތުން އަލުން ދަނޑަށް ނުކުމެ މަސައްކަތްތައް ފެށި އެވެ. އެގޮތުން ކުރެވުމު މަސައްކަތްތަކުން އޭރުގެ ސަރުކާރުގެ އެހީއާ އެކު ނިއުރޭޑިއަންޓްގެ ސަސްޕެންޝަން އުވާލެވި، ނިމިދިޔަ ދެ އަހަރު ވެސް ފުރަތަމަ ޑިވިޝަނަށް އަރަށް މަސައްކަތް ކުރި އެވެ. ނަމަވެސް ދެވަނަ ޑިވިޝަނުގެ ސެމީގައި ފުރަތަމަ އަހަރު ބުރު ސްޕޯޓްސް ކްލަބް އަތުން ބަލިވެ އަދި ދެވަނަ އަހަރު ސެމީގައި އެންމެ ވާދަވެރި ވިކްޓަރީ ސްޕޯޓްސް ކްލަބް އަތުން ބަލިވުމުން ފުރަތަމަ ޑިވިޝަނަށް އެރުމަށް ކުރި މަސައްކަތް އަދި އޮތީ ކާމިޔާބު ނުވެ އެވެ.

މި ވަގުތު ދެވަނަ ޑިވިޝަނުގައި އޮތް ނިއުރޭޑިއަންޓުގެ ކޮންގްރެސް ބާއްވަން ތައްޔާރުވަމުން އަންނައިރު، ޗެއާމަނުގެ މަގާމުގައި ހުރި ވާސިފް ވަނީ އިސްތިއުފާ ދީފައެވެ.