Ansar Ibrahim
ގައުމީ ފުޓްބޯޅަ ޓީމުން ބަންގްލަދޭޝް އަށް އައި އިރު ރާއްޖޭގެ ފުޓުބޯޅަ ހާލަތު އެނގޭ ކަމަށާއި, އެކަމަށް ފޯކަސްނުކޮށް މިއީ ފުޓްބޯޅައިގެ ކުރިއެރުމަށް ޓަކައި ކޮންމެ ކަމެއްވެސް ކުރަން ކުޅުންތެރިން ތައްޔާރަށް ތިބިކަން ސާބިތުކޮށްދޭންވީ ވަގުތު ކަމަށް ގައުމީ ފުޓްބޯޅަ ޓީމުގެ ކޯޗު އަލީ ސުޒޭން ބުނެފިއެވެ.
އެކުވެރި ކަމުގެ މެޗުތަކުގެ ކުރިން, މިއަދު ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަމުން ގައުމީ ކޯޗު ސުޒޭން ބުނީ، މި މެޗަށް ނުކުންނައިރު، ގިނަ ކުޅުންތެރިންނަކީ މާޒިޔާއަށް ނިސްބަތްވާ ކުޅުންތެރިން ކަމަށާއި އޭއެފްސީ ޗެލެންޖް ކަޕްގައި ކުޅެފައިވާ ކުޅުންތެރިން ކަމަށެވެ.
އަދި ދެން ތިބި ކުޅުންތެރިން ސެޕްޓެމްބަރު މަހުން ފެށިގެން ސުޒޭން އާއެކު ޕްރެކްޓިސް ކުރަމުން އައިސްފައިވާ ކަމަށެވެ. ނަމަވެސް މިވަގުތު ރާއްޖޭގެ އެންމެ މޮޅު އެއް ކުޅުންތެރިޔާ އައިސަމް ނުކުޅޭނެ ކަމަށާއި, ދެން ތިބި ހުރިހާ ކުޅުންތެރިން ވެސް މެޗަށް އެވެއިލަބަލް ކަމަށެވެ.
ސުޒޭން ބުނީ, ޓީމު މި މެޗުތަކަށް އައިއިރު, ހުރިހާ ކުޅުންތެރިން ވެސް ތިބީ މި ވޭތުވެ ދިޔަ އަހަރު އެކި ރަށްރަށުގައި ކުޅޭ މުބާރާތްތަކުގައި ބިޒީކޮށް ކަމަށާއި އަދި އޮގަސްޓް މަހުން ފެށިގެން މާޒިޔާ އިން ވެސް އައީ ޕްރެކްޓިސް ކުރަމުން ކަމަށެވެ.
މީގެ އިތުރުން ކޯޗު ބުނެފައިވަނީ ރާއްޖޭގެ ފުޓުބޯޅަ ހާލަތު ކޮންމެ ގޮތަކަށް އޮތް ކަމުގައި ވީނަމަވެސް, ދިވެހި ކުޅުންތެރިންގެ މޯޓިވޭޝަން ރަނގަޅު ވާނެ ކަމަށް ގަބޫލުކުރާ ކަމަށެވެ. މިއީ ބަންގްލަދޭޝް ގެ އަމިއްލަ ދަނޑު ކަމަށް ވުމުން, ބަންގްލަދޭޝް ޓީމު މި ދަނޑުގައި ވަރުގަދަވާނެކަން އެނގޭ ކަމަށާއި, ނަމަވެސް މި ދަނޑަކީ ދިވެހި ޓީމަށް ވެސް އާ ދަނޑަކަށް ނުވާނެ ކަމަށެވެ.
ބަންގްލަދޭޝްގެ ފުޓްބޯޅަ އާ ބެހޭގޮތުން ސުޒޭން ބުނެފައިވަނީ, ކުރިން ބަންގްލަދޭޝް ޓީމުން ރާއްޖެ ކޮޅަށް އަށެއް ނުވަތަ ނުވަ ގޯލު ޖަހާ ކަމަށެވެ. ނަމަވެސް މިހާރު ރާއްޖޭގެ ކުޅުން ވެސް ރަނގަޅުވެ، ބަންގްލަދޭޝްއާ ދެކޮޅަށް ކުޅުނު ގާތްގަނޑަކަށް ކޮންމެ މެޗަކުން ވެސް މޮޅުވަމުން އައިކަމަށެވެ. އެހެނަސް ފާއިތުވި ތިން އަހަރުގެ ތެރޭގައި އެކަން ބަދަލުވާން ފަށައިފި ކަމަށާއި, ދުވަހެއް ދުވަހަކަށް ބަންގްލަދޭޝްގެ ފުޓުބޯޅަ ވެސް އަންނަނީ ކުރިއަރަމުން ކަމަށެވެ.
އޭގެ މައިގަނޑު ސަބަބެއްގެ ގޮތުގައި ކޯޗު ފާހަގަ ކުރީ ބަންގްލަދޭޝްގައި ރަނގަޅު ކޯޗެއް ހުރުމާއި އޭނާއާ އެކު ޓީމުން ކޮށްފައިވާ މަސައްކަތެވެ. އެއާއެކު މެޗުތައް ކުޅެ ކުރިއެރުމަށް މަސައްކަތް ކުރަމުން އަންނަ އިރު, ދިވެހި ޓީމަށް މި ދިން ފުރުސަތަށް ބަންގްލަދޭޝް ފުޓުބޯޅަ ފެޑޭރަޝަނަށް ޝުކުރު އަދާކުރާ ކަމަށެވެ.
ގައުމީ ކެޕްޓަން ސަމޫހް އަލީ (ސަމުއްޓޭ) ބުނީ, ގައުމީ ޓީމު އެންމެ ފަހުން މެޗެއް ކުޅުނުތާ ގިނަ ދުވަސްތަކެއް ވެފައި ވީނަމަވެސް, ކޮންމެ ކުޅުންތެރިއެއްގެ ވެސް އަމާޒަކީ މި މެޗުން މޮޅުވުން ކަމަށެވެ. އަދި މެޗުގައި ދަތިތަކެއް ކުރިމަތިވާނެކަން އެނގޭ ކަމަށާއި, އެ ދަތިތަކުން އަރައިގަނެ, اللَّه ގެ އިރާދަފުޅާއެކު، މި މެޗުން މޮޅުވުމަށް މަސައްކަތް ކުރާނެ ކަމަށެވެ.
ދިވެހިރާއްޖެ އާ ބަންގްލަދޭޝް ބައްދަލު ކުރާ ފުރަތަމަ މެޗު، މިއަދު ހަވީރު 05:00 ގައި ފަށާނެ އެވެ. އަދި ދެވަނަ މެޗު ކުޅުމަށް ހަމަޖެހިފައިވަނީ 16 ނޮވެންބަރު ވާ ހޮނިހިރު ދުވަހުއެވެ. މި ދެ މެޗު ވެސް ކުޅޭނީ ބަންގްލަދޭޝްގެ ބަޝަންދުރަ ކިންގްސް އެރީނާގައެވެ.
