Mohamed Shabin IR
ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް)ގެ ޖެނެރަލް ސެކްރެޓަރީއަކަށް ނާހިލް އަހުމަދު ސިއްދީގު ހަމަޖައްސައިފިއެވެ.
އެންމެ ފަހުން އެ މަގާމުގައި ހުންނެވީ އެފްއޭއެމްގެ ކުރީގެ ރައީސް ބައްސާމް އަދީލް ޖަލީލްގެ ދައުރުގެ ފަހު ކޮޅުން ފެށިގެން އެ މަގާމު ފުރަމުން އައި މުހައްމަދު ޖައުޝަން ޝަރީފެވެ.
ބައްސާމްގެ ދައުރުގައި ޖައުޝަން ގެ ބައިވެރިވުން އޮތުމުން އެ މަގާމުގައި ޖައުޝަން ދެމިހުންނެވުމާ ގުޅިގެން އާންމުންގެ ފާޑުކިޔުން ވެސް އަމާޒުވެފައިވެއެވެ. އެއާއެކު, ފީފާއިން އެފްއޭއެމްއަށް ލަފާދިނީ އިންޓާނަލްކޮށް އާ ޖެނެރަލް ސެކްރެޓަރީއަކު އައްޔަން ކުރުމުގެ ބަދަލުގައި އޯޕަން ސެލެކްޝަން މަރުހަލާއަކުން ކޮލިފައިޑް ކެނޑިޑޭޓެއް ނެގުމަށެވެ.
ފީފާގެ ލަފަޔާ އެކު ނޯމަލައިޒޭޝަން ކޮމިޓީން ވަނީ ވަޒީފާއަށް މީހުން ހޯދަން އިއުލާނެއް ގެޒެޓުކޮށް، ކެންޑިޑޭޓުންނާ އިންޓަވިއު ކޮށްފަ އެވެ.
ކުރިން ވެސް އެފްއޭއެމްގައި މަސައްކަތް ކުރި ނާހިލް، ޖީއެސްގެ މަގާމަށް ހޮވުނީ ތައުލީމާއި ތަޖުރިބާ އަދި އިންޓަވިއު އިން ވެސް އެންމެ ގިާބިލް ކެންޑިޑޭޓްގެ ގޮތުގަ އެވެ.
ކުރިން ލަފާކޮށްފައި އޮތީ ނޯމަލައިޒޭޝަން ކޮމިޓީން އެފްއޭއެމް އާ ހަވާލުވެ އާ ޖެނެރަލް ސެކްރެޓަރީއެއް ފުރަތަމަ އައްޔަން ކުރާނެ ކަމަށެވެ. ނަމަވެސް ކޮމިޓީން ކުރިއަށް ދިޔައީ ޖައުޝަންއާ އެކުގައެވެ. ސްޕޯޓް ލޯޔަރެއްގެ މަގާމު ވެސް ފުރުއްވަމުން ގެންދަވާ ޖައުޝަން މީގެ ކުރިން ވިދާޅުވީ ނޯމަލައިޒޭޝަން ކޮމިޓީގެ ޗެއާމަން އަހުމަދު ޒުހޫރާއި ފީފާގެ އެދުމުގެ މަތިން އެ މަގާމުގައި ދެމިހުންނެވި ކަމަށެވެ.
ބެޗްލަރސް އޮފް އާޓްސް ބިޒްނަސް މަނޭޖްމަންޓް އެންޑް އިކޮނޮމިކްސް ހާސިލުކުރެއްވުމަށްފަހު މިހާރު ނާހިލްދަނީ މާސްޓާރ އޮފް ބިޒްނަސް އެޑްމިނިސްޓްރޭޝަން ވެސް ހާސިލްކުރަމުންނެވެ. ނާހިލް ވަނީ ކުރިން އެފްއޭމްގައި ތަފާތު އެކި މަގާމުތައް ފުރުއްވާފައެވެ. އެންމެ ފަހުން ނާހިލް ހުންނެވީ މިނިސްޓްރީ އޮފް ސްޕޯޓްސް ފިޓްނަސް އެންޑް ރެކްރިއޭޝަންގެ ސީނިއަރ ޕޮލިޓިކަލް ޑިރެކްޓަރުގެ މަގާމުގައެވެ.
އުމުރުން 24 އަހަރުގެ ނާހިލް މި މަގާމަށް ހަމަޖެއްސުމާއެކު، ފީފާ އަދި އޭއެފްސީގެ އެސޯސިއޭޝަން ތަކުގައި ތިބި އެންމެ ޒުވާން ޖެނެރަލް ސެކްރެޓަރީންގެ ލިސްޓަށް ނާހިލް ވަނީ އިތުރުވެފައެވެ.
