Sidibari
ބޫޓާން ކުރިއަށް ގެންދިޔަ ޓީ20 ކުއާޑްރަންގިއުލާ މުބާރާތުގެ އެންމެ މޮޅު ބެޓްސްމަނަކަށް ރާއްޖޭގެ ކެޕްޓަން ޔޫސުފް އަޒްޔާން ފަރުހަތު ހޮވިއްޖެ އެވެ.
މުބާރާތުގައި ކުޅުނު ހަތަރު މެޗުން އޭނާ ވަނީ 184 ލަނޑު ހަދައިފަ އެވެ. އެގޮތުން ބޫޓާނާ ދެކޮޅަށް ކުޅުނު ދެ މެޗާއި ތައިލެންޑާ ދެކޮޅަށް ކުޅުނު މެޗުގައި ވެސް އޭނާ ވަނީ 50 ހަމަކޮށް، ހާފް ޗެންޗަރީ ހަދައިފަ އެވެ.
މުބާރާތުގެ ފައިނަލަށް ރާއްޖެ ދަތުރު ކުރި ނަމަވެސް، ވިއްސާރަ ވުމުގެ ސަބަބުން މެޗު ކެންސަލް ކުރަން ޖެހި، ލީގު ބުރުގެ ނަތީޖާއަށް ބަލައި ތައިލެންޑަށް ޗެމްޕިއަންކަން ދޭން ނިންމީ އެވެ.
މުބާރާތުގައި އެންމެ ގިނަ ވިކެޓް ނެގި ކުޅުންތެރިންގެ ތެރޭގައި ވެސް ދިވެހި ކުޅުންތެރިއަކު ހިމެނެ އެވެ. ތައިލެންޑްގެ ޖަންޑްރޭ ކޮއެޓްޒީ އާއެކު ރާއްޖޭގެ އިބްރާހިމް ރިޒްހާން ވެސް ވަނީ މުބާރާތުގައި އަށް ވިކެޓް ނަގައިފަ އެވެ.
