މައިލޯ ވީއޭއެމް ކަޕްގެ ފިރިހެން ޑިވިޝަން ފަށައިފި

ހަތް ޓީމާ އެކު މިއަހަރުގެ ވޮލީބޯލް އެސޯސިއޭޝަން ކަޕް ފަށައިފި އެވެ.

މިއަދު ކުޅުނު ފުރަތަމަ މެޗުގައި ޕޮލިސް ކްލަބުން ވަނީ ސީދާ ތިން ސެޓުން ބްލޫސް ފޯ ވޮލީބޯލް ބަލިކޮށްފަ އެވެ. އެޓީމުން ސެޓްތައް ގެންދިޔައީ 25-22، 25-21 އަދި 25-19 އިންނެވެ.

ދެވަނަ މެޗުގައި ކްލަބް ހާފް ލައިން ލިންކޭޖާ ވާދަކޮށް އެޗްޑީސީން ސެޓްތައް ގެންދިޔައީ 25-22، 25-19 އަދި 25-16 އިންނެވެ.

އެންމެ ފަހުގެ ޗެމްޕިއަން ސިޓީ ސްޕޯޓްސް ކްލަބް ވަނީ މިރޭ ސްޕޯޓްސް ކްލަބް ސިޓީއާ ވާދަކޮށް 3-1 ސެޓުން ބަލިވެފަ އެވެ. މި މެޗުގެ ސެޓްތައް ގެންދިޔައީ 27-25، 20-25، 25-17 އަދި 25-18 އިންނެވެ.

ވާދަކުރާ ޓީމުތައް ދެ ގުރޫޕަކަށް ބަހާލާފައި ވާއިރު، ގުރޫޕް އޭގައި ހިމެނެނީ ޕޮލިހާއި ބްލޫސް އަދި ސިޓީ ސްޕޯޓްސް ކްލަބާއި ސްޕޯޓްސް ކްލަބް ސިޓީ އެވެ.

ގުރޫޕް ބީގައި ހިމެނެނީ އެޗްޑީސީ އާއި ހާފް ލައިން ލިންކޭޖް އަދި ދިވެހި ސިފައިންގެ ކްލަބް އެވެ.