Ansar Ibrahim
ކުއާރްޒޯ މެންގްރޫވް އައިލެންޑް ފުޓްބޯޅަ ޗެމްޕިއަންޝިޕް 2024 ގެ ފައިނަލުގައި ވިންޑް ވޯރިއާސް އިން ނައިފަރު ޗެލްސީގެ މައްޗަށް 3-0 އިން ކުރި ހޯދައިގެން ޗެމްޕިއަންކަން ހޯދައިފި އެވެ.
ފުރަތަމަ ހާފުގައި ނައިފަރު ޗެލްސީ އަތުން ބައިކޮޅަށް ވަން ގޯލަށް ފަހު ވިންޑް ވޯރިއާސްގެ ފަހު ދެ ގޯލު ޖަހައިދިނީ އައިސަމް އިބްރާހިމް އާއި އަލީ ނޫމާން (ހެލްމެޓް) އެވެ.
ފައިނަލްގައި އައިސަމްގެ ފަރާތުން ތަފާތު މޮޅު ކުޅެމެއް ފެނުނެވެ. ނަތީޖާއެއްގެ ގޮތުން މެޗުގެ އެންމެ މޮޅު ކުޅުންތެރިޔާގެ މަގާމު ވެސް ހޯދީ އޭނާ އެވެ.
މުބާރާތުގެ އެންމެ މޮޅު ކުޅުންތެރިޔާގެ މަގާމު ހޯދީ ވިންޑް ވޯރިއާސްގެ ޢަބްދުﷲ ޔާމީން (ޔާނު) އެވެ. އެންމެ މޮޅު ގޯލްކީޕަރުގެ މަގާމު ހޯދި އެޓީމުގެ އިޔާން އަބްދުލް އަލީމް (ޗިކީ) އެވެ. މުބާރާތުގެ އެންމެ ގިނަ ގޯލު ޖެހި ކުޅުންތެރިޔާއަކީ ނައިފަރު ޗެލްސީގެ ބެލަރޫސް މިޑްފީލްޑަރު އިވާން ވެރާސްއެވެ.
ފައިނަލް މެޗާ ހަމައަށް އައިއިރު ނައިފަރު ޗެލްސީއަކީ ބަލިނުވެ އޮތް ހަމައެކަނި ޓީމެވެ. ވިންޑް ވޯރިއަރސް ހަމައެކަނި ބަލިވީ ނައިފަރު ޗެލްސީއާ ދެކޮޅަށް ގްރޫޕް ސްޓޭޖްގައި ކުޅުނު މެޗުންނެވެ.
ވިންޑް ވޯރިއަރސް ކުރިން ވެސް ފައިނަލް ކުޅުނު ޓީމެކެވެ. ނަމަވެސް މިއީ އެ ޓީމު ޗެމްޕިއަންކަން ހޯދި ފުރަތަމަ ފަހަރެވެ.
ނިންމުމުގެ ރަސްމިއްޔާތުގައި، ކެނދިކުޅުދޫ ކައުންސިލްގެ ރައީސްވަނީ އަންނަ އަހަރުން ފެށިގެން މި މުބާރާތް ދެ ތަނެއްގައި ބާއްވަން ރޭވިފައިވާކަން އިއުލާން ކޮށްފައެވެ.
މުބާރާތުގެ ޗެންޕިއަން ޓީމަށް 150,000 ރުފިޔާގެ ފައިސާގެ އިނާމެއް ވަނީ ކަނޑައެޅިފަ އެވެ.
