Ansar Ibrahim
ހުނަރުވެރި ޒުވާން ފެތުންތެރިޔާ، މުހައްމަދު ރިހާން ޝިހާމް، 59 ވަނަ މައިލޯ/އެމްއޭއެސް މެލޭޝިއާ އިންވިޓޭޝަނަލް އޭޖް ގްރޫޕް ސްވިމިން ޗެމްޕިއަންޝިޕްގައި ގައުމީ ދެ ރެކޯޑް މުގުރާލައިފިއެވެ.
ރިހާން ވަނީ 400 މީޓަރު ފްރީސްޓައިލް އިވެންޓް 04:28.34 އިން ނިންމައި، މިއަހަރުގެ އޭޕްރީލް މަހު އޭނާ އަރީނާ ތައިލެންޑް ޗެމްޕިއަންޝިޕްގައި 04:29.07 އިން ފަތައިގެން ހެދި ގައުމީ ރެކޯޑު އާކޮށްފަ އެވެ. ރިހާން މި ކެޓަގަރީގެ ގައުމީ ރެކޯޑު ފުރަތަމަ ފަހަރަށް ހެދީ ފެބްރުއަރީ މަހު ދޯހާގައި ބޭއްވުނު ވޯލްޑް އެކުއެޓިކްސް ޗެމްޕިއަންޝިޕްގައި 04:31.96 ގައި ފަތައިގެންނެވެ.
މިހާރު ކުރިއަށްދާ މެލޭޝިއާ ޗެމްޕިއަންޝިޕްގެ ބަޓަފްލައި 50 މީޓަރު އިވެންޓްގައި ރިހާން ވަނީ 00:26:98 ގައި ނިންމައި، 2023 ވަނަ އަހަރުގެ އިންޑިއަން އޯޝަން އައިލެންޑް ގޭމްސްގައި މުޙައްމަދު އާން ޙުސައިން 00:27.23 އިން ފަތައިގެން ހެދި ރެކޯޑް މުގުރާލައިފަ އެވެ.
އެންމެ ފަހުގެ ދެ ރެކޯޑުގެ އިތުރުން، ރިހާން ވަނީ މިއަހަރުގެ އޭޕްރީލް މަހު އަރީނާ ތައިލެންޑް ޗެމްޕިއަންޝިޕްގައި ހެދި 800 މީޓަރު އަދި 200 މީޓަރު ފްރީސްޓައިލް ގައުމީ ރެކޯޑުތައްވެސް ހަދައިފައެވެ. އަދި މީގެ އިތުރުން 100 މީޓަރު އަދި 200 މީޓަރު ބަޓަފްލައިގެ ގައުމީ ރެކޯޑު ވެސް އޮތީ އޭނާ އަތުގަ އެވެ.
