Ansar Ibrahim
ނެޓްބޯޅަ އާއި ފުޓްސަލް އިންޑޯ ކޮމްޕްލެކްސް އެޅުމަށް ދެ ބިމެއް ވަނީ ދޫކޮށްފައެވެ.
އިންޑޯ ފުޓްސަލް ކޮމްޕްލެކްސް ހެދުމަށް 54،992 އަކަފޫޓުގެ ސަރަހައްދެއް ދޫކުރީ ހުޅުމާލޭ ފޭސް ޓޫ ޝެލްޓާ ޓަވަރު އެކެއްގެ އުތުރުންނެވެ. އިންޑޯ ނެޓްބޯޅަ ކޮމްޕްލެކްސް އެޅުމަށް 50،142 އަކަފޫޓުގެ ސަރަހައްދެއް ދީފައިވަނީ ފޭސް އެކެއްގައި ހުންނަ ގާޒީ ސްކޫލް ކުރިމަތީގައި ހުރި ބިމުންނެވެ. މި ދެ ކޮމްޕްލެކްސްއަކީ ވެސް ފައިވް ޕިޗް އިންޑޯ ކޮމްޕްލެކްސްތަކެވެ.
ބިން ދޫކުރުމަށް އެޗްޑީސީ އާއި ފިނޭންސް މިނިސްޓްރީ އާއި ކުޅިވަރާ ބެހޭ ވުޒާރާއާ ދެމެދު ވަނީ އެއްބަސްވުމުގައި ސޮއިކޮށްފައެވެ. އިއްޔެ ހަވީރު ފޭސް ޓޫ ޝެލްޓާ ސަރަހައްދުގައި ބޭއްވި ރަސްމިއްޔާތެއްގައި އެޗްޑީސީގެ ފަރާތުން އެއްބަސްވުމުގައި ސޮއިކުރެއްވީ މެނޭޖިން ޑިރެކްޓަރު އިބްރާހިމް ފަޒުލް ރަޝީދެވެ. ފިނޭންސް މިނިސްޓްރީ ތަމްސީލް ކުރެއްވީ މިނިސްޓަރު މުހައްމަދު ޝަފީގެވެ. ކުޅިވަރާ ބެހޭ ވުޒާރާގެ ފަރާތުން ސޮއިކުރެއްވީ މިނިސްޓަރު އަބްދުالله ރާފީއު އެވެ.
މި ރަސްމިއްޔާތުގައި މިނިސްޓަރ ރާފީއު ވިދާޅުވީ މި ދެ ކޮމްޕްލެކްސްއަކީ ރާއްޖޭގެ ކުޅިވަރު ތާރީޚުގައި އަޅާ އެންމެ ބޮޑު މަލްޓި ޕާޕަސް ކޮމްޕްލެކްސް ކަމަށެވެ. އަދި މި ދެ އިމާރާތުގެ ސަބަބުން ކުޅިވަރަށް އިންގިލާބީ ބަދަލުތަކެއް އަންނާނެ ކަމަށް އޭނާ ވިދާޅުވިއެވެ. ފަޒުލް ވިދާޅުވީ ކުޅިވަރު ކުރިއެރުވުމަށް އެ ކުންފުނިން އަބަދުވެސް އެއްބާރުލުން ދެނީ މިއީ ޒުވާނުންނަށް އެންމެ މުހިންމު އެއް މައްސަލައަށް ވާތީ ކަމަށެވެ.
އިންޑޯ ކުޅިވަރެއްގެ ގޮތުގައި އޮތް ފުޓްސަލްއަކީ ރާއްޖޭގައި މަގުބޫލު ކުޅިވަރެއް ނަމަވެސް މުބާރާތްތައް ބާއްވަނީ ފީފާގެ މިންގަނޑުތަކަށް ނުފެތޭ މިނީ ޓާފް ދަނޑުތަކުގައެވެ.މީގެ ހަތް އަހަރު ކުރިން ރަސްމީ ނެޓްބޯޅަ މުބާރާތްތައް ބޭރުގައި ބާއްވަނީ ހުސް ދަނޑުގައެވެ. ނަމަވެސް ފަހުން ސޯޝަލް ސެންޓަރުގެ އިންޑޯ ކޯޓު މުބާރާތްތަކަށް ބޭނުންކުރިއެވެ. ކްލަބްތަކުން އަދިވެސް ޕްރެކްޓިސް ކުރުމަށް ބޭނުންކުރަނީ އައުޓްޑޯ ކޯޓެވެ.
