Ansar Ibrahim
މަސްއޮޑި ސްޕޯޓްސް ކްލަބް ވަނީ ދެވަނަ ޑިވިޝަން ފުޓްބޯޅަ މުބާރާތުގެ ސެމީފައިނަލްގައި ޓެންޓް ސްޕޯޓްސް ކްލަބްގެ މައްޗަށް 5-1 އިން ކާމިޔާބު ހޯދައި، ކުރިއަށް އޮތް ސީޒަންގައި ދިވެހި ޕްރިމިއަރ ލީގަށް ޕްރޮމޯޓްވެފައެވެ.
މިއީ މަސްއޮޑި ސްޕޯޓްސް ކްލަބް އެންމެ މަތީ ފަންތީގައި ވާދަކުރާ ފުރަތަމަ ފަހަރެވެ. އެމީހުން ވަނީ ތިންވަނަ ޑިވިޝަން މުބާރާތުގައި ރަނަރަޕްގެ މަޤާމު ހޯދާފައެވެ.
މަސްއޮޑި އިން ވަނީ މެޗުގެ ފުރަތަމަ ހާފުގައި ލީޑު ހޯދާފައެވެ. މަސްއޮޑިގެ ފުރަތަމަ ގޯލްޖަހައިދިނީ އަލީ ޝާމިސް (ތޮއްޕޭ) ގެ ހުރަހަކުން ޙުސައިން ޝަރީފެވެ. ނަމަވެސް، ޓެންޓުން ވަނީ ފުރަތަމަ ހާފު ނިމުމުގެ ކުރިން ނަތީޖާ އެއްވަރުކޮށްފައެވެ. މި ގޯލު ޖަހައިދިނީ ޓެންޓުގެ ލަންކާ ކުޅުންތެރިޔާ ޗަލަނަ ޗަމީރާއެވެ. މިއީ މި މުބާރާތުގައި މަސްއޮޑި ސްޕޯޓްސް ކްލަބް ކޮޅަށް ގޯލެއް ވަތް ފުރަތަމަ ފަހަރެވެ.
މަސްއޮޑި ސްޕޯޓްސް ކްލަބުންވަނީ ދެވަނަ ހާފުގައި ދެވަނަ ފަހަރަށް ލީޑު ހޯދާފައެވެ. އެގޮތުން އިސްލާމް ފިކުރީ ގަބާލާ ވަނީ ޕެނަލްޓީއެއް ކާމިޔާބުކޮށްފައެވެ. މި ޕެނަލްޓީއަކީ އިދިކޮޅު ޓީމުގެ ގޯލްކީޕަރު ޕެނަލްޓީ އޭރިއާ ތެރެއިން ހުސައިން ޝަރީފަށް ކުރި ފައުލަކަށް ދީފައިވާ ޕެނަލްޓީއެކެވެ.
މި މެޗުގައި މަސްއޮޑި ސްޕޯޓްސް ކްލަބް ގެ ލީޑު ފުޅާކޮށްދިނީ އަބްދުﷲ ޒިޔާން (ޖަންކީ) އެވެ. އަދި މުޙައްމަދު އަލްސައްޔިދު މެޗުގެ ހަތަރުވަނަ ގޯލް ކާމިޔާބު ކޮށްދިން އިރު, މެޗުގެ އިތުރު ވަގުތުގައި ޒިޔާން ވަނީ ފަސްވަނަ ގޯލް ކަމިޔާބު ކޮށްދީފައެވެ.
މަސްއޮޑި ސްޕޯޓްސް ކްލަބުން ވަނީ ގްރޫޕް ސްޓޭޖްގެ ހަތަރު މެޗު ކްލީން ޝީޓާއެކު ނިންމާފައެވެ. ފުރަތަމަ ދެ މެޗުގައި މަހިބަދޫ ސްޕޯޓްސް ކްލަބާއި އެލްޓީ ސްޕޯޓްސް އާ ދެކޮޅަށް 4-0 އިން ކާމިޔާބު ހޯދާފައެވެ. އޭގެ ފަހުން ތިންވަނަ މެޗުގައި ޖޭޖޭ ސްޕޯޓްސް ކްލަބާ ދެކޮޅަށް 6-0 ގެ ތަފާތު ބޮޑު ނަތީޖާއަކުން މޮޅުވިއިރު, ގްރޫޕް ސްޓޭޖްގެ ފަހު މެޗުގައި ކުޑަހެންވޭރު ޔުނައިޓެޑާ ދެކޮޅަށް 1-0 އިންވަނީ ކާމިޔާބު ހޯދާފައެވެ.
މަސްއޮޑި ސްޕޯޓްސް ކްލަބުން ސެމީފައިނަލަށް އައިސްފައިވަނީ, ކުއާޓަރ ފައިނަލުގައި ބީޖީ ސްޕޯޓްސް ކްލަބްގެ މައްޗަށް 5-0 އިން ކުރި ހޯދައިގެންނެވެ.
ދެވަނަ ޑިވިޝަން ފައިނަލުގައި މަސްއޮޑި ސްޕޯޓްސް ކްލަބް ނުކުންނާނީ މުބާރާތުގެ ދެވަނަ ސެމީފައިނަލުގައި ނިއުރޭޑިއަންޓް ސްޕޯޓްސް ކްލަބާއި ވިކްޓްރީ ސްޕޯޓްސް ކުލަބް ބައްދަލު ކުރާ މެޗުން މޮޅުވާ ޓީމާއެވެ.
