Ansar Ibrahim
ހުޅުމާލެ ރެހެންދި ޓާފް ދަނޑުގައި ކުލަބް މޯލްޑިވްސް ކަޕް 2024 މިއަދު ފަށައިފި އެވެ.
އަށާރަ ވަނަ ކްލަބް މޯލްޑިވްސް ފުޓްސަލް ސީޒަންގެ މައި އިވެންޓްގައި މިއަހަރު ވާދަކުރަނީ 28 ޓީމެވެ. މި ޓީމުތައް ވަނީ ހަތް ގުރޫޕަކަށް ބަހާލައިފަ އެވެ. ނޮކައުޓް ބުރު ފެށުމަށް ހަމަޖެހިފައިވަނީ އަންނަ އޮކްޓޯބަރު މަހުގެ ހަތް ވަނަ ދުވަހު އެވެ.
މި ސީޒަން ފެށީ މިދިޔަ އަހަރުގެ ސީއެމްސީ ޗެމްޕިއަން ޓީމް ވެމްކޯ އާއި ރިސޯޓް ސުޕަ ލީގުގެ ޗެމްޕިއަން ޖޯއަލީ މޯލްޑިވްސް ބައްދަލުކުރި މެޗަކުންނެވެ. މީގެ ކުރިން ކުރިއަށް ދިޔައީ މި މުބާރާތުގެ ސީއެމްސީ ކްލާސިކް، އެއިޓީން ތާޓީ (އަންހެނުންގެ ޗެމްޕިއަންޝިޕް)، އަދި ކިންގްސް ކަޕްގެ މެޗުތަކެވެ. ޕޮލިސް ކުލަބުން އެއިޓީން ތާޓީ ޗެމްޕިއަންކަން ހޯދިއިރު، ސީއެމްސީ ކްލަސިކް ޗެމްޕިއަންކަން ހޯދީ ކުޅިވަރު ވުޒާރާއެވެ.
ކިންގްސް ކަޕް މޮޅުވުމަށްފަހު ވެމްކޯގެ އަމާޒަކީ ޗެމްޕިއަންކަން ދިފާއުކުރުން ކަމަށްވާއިރު، މިދިޔަ އަހަރުގެ ރަނަރަޕް ޓީމް ރޯޑް ރެކްރިއޭޝަން ކްލަބުގެ އަމާޒަކީ ވެމްކޯގެ މައްޗަށް ކުރި ހޯދުމެވެ. އެމްޕީއެލް، ބީއެމްއެލް، އެމްއޭސީއެލް، އެސްޓީއޯ، އަދި ފެނަކަ ފަދަ ކުރީގެ ޗެމްޕިއަނުންނަކީ ވެސް މި ސީޒަނުގައި ވަރުގަދަ ވާދަވެރިންނެވެ.
