ކުޅިވަރު ވުޒާރާއިން ކްލަބް މޯލްޑިވްސް ކަޕް ކްލަސިކް ތަށި އުފުލާލައިފި

ކްލަބް މޯލްޑިވްސް ކަޕް ކްލަސިކް 2024 ގެ ފައިނަލުގައި އެމްއެމްއޭ އެސްސީއާ ވާދަކޮށް 8-0 އިން ކުރި ހޯދައިގެން މޮޅުވެ މިނިސްޓްރީ އޮފް ސްޕޯޓްސް، ފިޓްނަސް އެންޑް ރެކްރިއޭޝަންގެ ފުޓްސަލް ޓީމު، ކުޅިވަރު ވުޒާރާ މޮޅުވެއްޖެ އެވެ.

ސާޖިދު އަހުމަދު އިބްރާހިމް ހަތަރު ގޯލު ޖެހި އިރު، 17 ގޯލާ އެކު މުބާރާތުގެ ޓޮޕް ސްކޯރާގެ މަގާމާއި މޮޅު ކުޅުންތެރިޔާގެ މަގާމް ވެސް ހޯދި ނާއިފް ޝަފީގު ވަނީ ހެޓްރިކް ހަދައިފަ އެވެ. އެޓީމުގެ އަށް ވަނަ ގޯލު ޖެހީ އާދިލް އެވެ.

ޗެމްޕިއަނުން ފައިނަލަށް ދަތުރުކުރީ ސެމީ ފައިނަލުގައި މިނިސްޓްރީ އޮފް ސޯޝަލް އެންޑް ފެމިލީ ޑިވެލޮޕްމަންޓްގެ ޓީމް ބަދާހި އަތުން 6-2 އިން މޮޅުވެގެންނެވެ. އެމްއެމްއޭ ސެމީގައި މޮޅުވީކްލަބް 220 އާ ވާދަކޮށް 2-1 އިންނެވެ.

ކުޅިވަރު ވުޒާރާގެ ދެ ތަރިން ކަމަށްވާ ސާޖިދާއި ނާއިފް ވަނީ މުބާރާތުގެ ގަދަ ފަސް ކުޅުންތެރިންގެ ތެރޭގައި ހިމެނިފަ އެވެ. ގަދަ ފަސް ކުޅުންތެރިންގެ ތެރޭގައި ދެން ހިމެނެނީ ރަނަރަޕް އެމްއެމްއޭގެ މުހައްމަދު ނާއިފް އާއި ކްލަބް 220ގެ މިއުރާޝް އަދި ޓީމް ބަދާހީގެ އާސިފް ހަނީފްއެވެ.

ޕަބްލިކް ސެކްޓާގެ ތެރޭގައި ހިމެނޭ މުއައްސަސާތަކަށް ހާއްސަކޮށްގެން ބާއްވާ ކްލަބް މޯލްޑިވްސް ކަޕްގެ ކްލަސިކް މުބާރާތް، ސެޕްޓެމްބަރު މަހުގެ ފުރަތަމަ ހަފްތާގައި ފެށީ  32 ޓީމާ އެކު އެވެ. ޓީމުތައް އަށް ގުރޫޕަކަށް ބަހާލައިގެން ގްރޫޕް ސްޓޭޖުގައި ޖުމްލަ 48 މެޗު ކުޅެފައިވެ އެވެ.