Ansar Ibrahim
ޖަރުމަނު ވިލާތުގެ ވެރިރަށުގައި ކޮންމެ އަހަރަކު ބާއްވަމުން އަންނަ ބަރލިން މެރަތަންގެ 2025 ވަނަ އަހަރުގެ ރޭހުގައި ބައިވެރިވުމުގެ ފުރުސަތު އެތުލެޓިކްސް އެސޯސިއޭޝަން އޮފް މޯލްޑިވްސް އިން ދިވެހި ދުވުންތެރިންނަށް ހުޅުވާލައިފި އެވެ.
ބަރލިން މެރަތަން 2025 ގައި ބައިވެރިވުމަށް ފުރުސަތު ހުޅުވާލައިފައިވަނީ މި ނޮވެމްބަރު މަހުގެ 27 އިން 30 އަށެވެ. އަދި އެއަށްފަހު ފޯމުތައް ޗެކުކޮށް ތަރުތީބު ކުރުން ކުރިއަށްދާނީ ޑިސެންބަރު މަހު 1 އަދި 2 ގައެވެ. ޑިސެންބަރު 3 އިން 12 އަށް ކުރިއަށްދާނީ ފައިސާ ބަލައިގަތުމެވެ. އަދި މުބާރާތުގެ ރެޖިސްޓްރޭޝަން އޭގެ ފަހުން ކުރިއަށް ދާނެކަމަށް އެތުލެޓިކްސް އެސޯސިއޭޝަން އިން އާންމުކުރި ޕޯސްޓެއްގައި ވެއެވެ.
ޖަރުމަނު ވިލާތުގެ ކާރު ކުންފުންޏެއް ކަމުގައިވާ ބީ.އެމް.ޑަބްލިއު އިން އިންތިޒާމުކުރާ 2025 ބާލިން މެރެތަން އަކީ މި އިވެންޓުގެ 51 ވަނަ އަހަރީ މެރެތަންއެވެ. ބާލިން މެރެތަން ނިންމިކަށް ބެލެވޭނީ ދުވުން ފެށުމަށްފަހު އެންމެ ލަސްވެގެން 6 ގަޑި އިރާ 15 މިނެޓު ތެރޭގައި ނިންމާ ރޮނގު ހުރަސް ކުރުމުންނެވެ.
ބާލިން މެރެތަން އަކީ ‘ވޯލޑް މޭޖާސް’ ގެ ލަގަބު ލިބިފައިވާ ދުނިޔޭގެ އެންމެ މަގުބޫލު 6 މެރެތަންގެ ތެރެއިން އެއް މެރެތަން އެވެ. މި ލިސްޓުގައި ދެން ހިމެނެނީ އިނގިރޭސިވިލާތުގެ ލަންޑަން، ޖަޕާނުގެ ޓޯކިޔޯ، އަދި އެމެރިކާގެ ނިއުޔޯކު، ޗިކާގޯ އަދި ބޮސްޓަން މެރެތަން އެވެ. މީގެ އިތުރުން އަންނަ އަހަރުން ފެށިގެން އޮސްޓްރޭލިޔާގެ ސިޑްނީ މެރެތަންވެސް ‘ވޯލްޑް މެޖާ’ އެއް ކަމުގައި ބަލައިގަތުމަށް ވޯލްޑް އެތުލެޓިކްސްއިން ވަނީ ނިންމާފައެވެ.
ރާއްޖޭގެ އެތުލެޓިކްސް އެސޯސިއޭޝަން އިން އަންނަނީ ބޭރު ގައުމުތަކުގައި ބާއްވާ ތަފާތު ދުވުންތަކާއި މެރަތަން ތަކުގައި ރާއްޖޭގެ އެކި އުމުރުފުރާގެ އެތުލީޓުން ބައިވެރިވުމަށް އެހީތެރިކަން ފޯރުކޮށްދެމުންނެވެ.
މެރަތަން ނުވަތަ ދިގު ދުވުންތަކަކީ، ދިގުމިނުގައި 42.195 ކިލޯ މީޓަރު ހަމަވާ ދުވުން ތަކެވެ. މެރެތަން ދުވުން ތަކަކީ ރާއްޖޭގައިވެސް އެކި ނަންނަމުގައި ބާއްވަމުން އަންނަ ހަރަކާތެކެވެ. އަދި މިއީ ދިވެހި އެތުލީޓުންގެ ތެރެއިން ގިނަ ބަޔަކު ޝައުގުވެރިވެގެން ބައިވެރިވަމުން އަންނަ ދުވުމެއް ވެސް މެއެވެ.
އެކި އަހަރުތަކުގައި ރާއްޖޭގެ ގިނަ އެތުލީޓުންތަކެއް ވަނީ ބާލިން މެރެތަންގައި ވާދަކޮށް އެކި ފަހަރު މަތިން ގައުމީ ރެކޯޑްތައް ވެސް އާކޮށްފަ އެވެ. ދުނިޔޭގެ އެތައް ގައުމަކުން ބައިވެރިވާ ބަރލިން މެރަތަން 2025 އޮންނާނީ އަންނަ އަހަރުގެ ސެޕްޓެމްބަރު މަހުގެ 21 ވަނަ ދުވަހު އެވެ.
