އޮލިމްޕިކްސްއަށް ކޮލިފައިވެ ދީމާ ތާރީހުގެ ތެރެއަށް

ދެކުނު އޭޝިއާ ކޮލިފިކޭޝަންސްގެ ސިންގަލްސް ޗެމްޕިއަންކަން ހޯދައި، މިއަހަރުގެ ޖުލައި މަހުގެ އޮންނަ އޮލިމްޕިކްސް އިން ރާއްޖޭގެ ޓީޓީ ތަރި ފާތިމަތު ދީމާ އަލީ ޖާގަ ހޯދައިފި އެވެ.

އުމުރުން އެންމެ 16 އަހަރުގައި ފާތިމަތު ދީމާ އަލީ އޮލިމްޕިކްސް އަށް ކޮލިފައިވެ، ރާއްޖޭއިން އޮލިމްޕިކްސްއަށް ކޮލިފައިވި ފުރަތަމަ ދިވެހި އެތުލީޓުގެ ޝަރަފް ހޯދީ ސްރީލަންކާގެ ޗެމްޕިއަން ބިމަންޑީ ބަންޑާރަ 4-1 ސެޓުން ބަލިކޮށްގެންނެވެ.

މެޗުގެ ސެޓުތައް ދީމާ ގެންދިޔައީ 11-8، 7-11، 13-11، 11-7 އަދި 11-5 އިންނެވެ. ކޮލިފައިންގެ ސެމީ ފައިނަލުން ދީމާ ޖާގަ ހޯދީވެސް ސްރީލަންކާގެ ކުޅުންތެރިއެއް ބަލިކޮށްގެންނެވެ.

ދީމާ، އަކީ ރާއްޖޭގެ ކުޅިވަރު ތާރީހުގައި އޮލިމްޕިކްސް އަށް ކޮލިފައިވެގެން، ވާދަކުރާނެ ފުރަތަމަ އެތުލީޓެވެ. މީގެ ކުރިން ރާއްޖެ އަށް މުޅިން ވެސް އޮލިމްޕިކްސް އިން ފުރުސަތު ލިބިފައިވަނީ، ކޮލިފައިނުވާ ގައުމުތަކުގެ ތެރެއިން ލިބޭ އިންވިޓޭޝަނަލް (ޓްރައިޕާޓައިޓް)ގެ ފުރުސަތުގެ ގޮތުގަ އެވެ.

މިމަހުގެ 13-15 އަށް ނޭޕާލްގެ ކަތަމަންޑޫގައި ކުރިއަށްދިޔަ ރީޖަނަލް ކޮލިފައިންގައި ދީމާގެ އިތުރުން ގައުމީ އަންހެން ޓީމްގެ މިޝްކާ މުހައްމަދު އިބްރާހިމްވެސް ވާދަކުރި އެވެ. މީގެ އިތުރުން ފިރިހެން ދެ ކުޅުންތެރިންކަމަށްވާ މޫސާ މުންސިފް އަހުމަދު އާއި އަޚްޔާރު އަހުމަދު ޚާލިދުވެސް ވާދަކުރި އެވެ.