Ismail Azmeen
ހިޔާނާތާއި މަނީ ލޯންޑަރިންގެ ތުހުމަތުގައި ދައުވާ އުފުލާފައިވާ، އެފްއޭއެމްގެ ރައީސް ބައްސާމް އަދީލް ޖަލީލްގެ ޕާސްޕޯޓް ހިފަހައްޓާފައި އޮތް އޮތުން ޝަރީއަތް ނިމެންދެން ދަމަހައްޓަން ކްރިމިނަލް ކޯޓުން އަމުރުކޮށްފި އެވެ.
އެފްއޭއެމްގެ ރައީސްގެ މަގާމުގައި ހުންނެވި ބައްސާމްގެ ޕާސްޕޯޓް ދައުލަތުން ހިފެހެއްޓީ، އެފްއޭއެމްގެ ފައިސާ އަށް ހިޔާނާތްތެރިވި ކަމުގެ ތުހުމަތުގައި ބަލަމުން ގެންދާ މައްސަލައާ ގުޅިގެންނެވެ. އޭނާގެ ޕާސްޕޯޓު ހިފަހައްޓަން މިދިޔަ ޑިސެމްބަރު މަހު އަމުރު ނެރުނުއިރު، އެ މުއްދަތު އަންނަ މަހަށް އޮތީ ހަމަވާ ގޮތަށެވެ.
އަނެއްކޮޅުން މިދިޔަ ހަފްތާ ބަންދުގައި ތައިލެންޑުގައި އޮތް ފީފާގެ އަދި އޭއެފްސީ ކޮންގްރެސްއަށް ދިޔުމަށް، ބައްސާމް ވަނީ ޕާސްޕޯޓު ދޫކޮށްދިނުމަށް އެދިފަ އެވެ. ނަމަވެސް ކްރިމިނަލް ކޯޓުން ވަނީ އޭނާގެ ޝަރީއަތް ނިމެންދެން ޕާސްޕޯޓު ހިފަހައްޓަން ނިންމާފަ އެވެ.
ބައްސާމްގެ ބަދަލުގައި ފީފާ އަދި އޭއެފްސީ ކޮންގްރެސްގައި ރާއްޖެ ތަމްސީލްކުރެއްވީ އެފްއޭއެމްގެ ނައިބު ރައީސް އަލީ އުމަރު އާއި ޖެނެރަލް ސެކެޓްރީ މުހައްމަދު ޖައުޝަން ޝަރީފް އެވެ.
މީގެ ކުރިން އޭއެފްސީގެ އެހެން ބައްދަލުވުމަކަށް ދިޔުމަށްވެސް ބައްސާމް ޕާސްޕޯޓު ދޫކޮށްދިނުމަށް އެދުނެވެ. މިދިޔަ ފެބްރުއަރީ މަހު ގަތަރުގައި އޮތް އޭއެފްސީގެ ބައްދަލުވުމުގައިވެސް އޭނާއަށް ބައިވެރިވުމުގެ ފުރުސަތެއް ކޯޓުން ދީފަ އެއް ނުވެ އެވެ.
ހިޔާނާތާއި މަނީ ލޯންޑަރިންގެ ތުހުމަތުގައި ދައުލަތުން ބައްސާމަށް ދައުވާކޮށްފައިވާއިރު، ބައްސާމްއާ ގުޅުންހުރި އެހެން މައްސަލަތަކެއްވެސް ފުލުހުން އަންނަނީ ތަހުގީގުކުރަމުންނެވެ.
