Ali Thameem
ނައިންޓީ ޕްލަސް ގޯލްޑް ކަޕުގައި ހުރިހާ މެޗަކުން މޮޅުވަމުން އައި ބ.އޭދަފުށި ބަލިކޮށް، ކ.މާފުށިން ކުއާޓާ ފައިނަލުގެ އުއްމީދު ބޮޑުކޮށްފި އެވެ.
ގުރޫޕް ސްޓޭޖުގެ ދެވަނަ ބުރު މިއަދު ފަށާފައި ވާއިރު، މިރޭ ގަލޮޅު ދަނޑުގައި ކުޅުނު މެޗުން މާފުށި މޮޅުވީ އޭދަފުށި ކޮޅަށް ދެގޯލު ޖަހައިގެން ނެވެ. ފުރަތަމަ ހާފުގެ 33 ވަނަ މިނެޓުގައި އޭދަފުށީގެ ހާފު މެދުތެރެއިން ބޯޅަ އަތުލައިގެން ކުރި އެޓޭކެއްގައި، ވާ އަތްފަރާތުން އެތެރެއަށް ކޮށްޓުމަށްފަހު ގޯލުގެ ދުރު ކަނަށް ބޯޅަ ފޮނުވާލައި މާފުށްޓަށް ކުރި ހޯދައިދިނީ އިބްރާހީމް އަތީގު ހަސަން އެވެ.
ދެ ޓީމަށްވެސް ގޯލު ޖަހާނެ ރަނުގެ ފުރުސަތުތަކެއް ލިބިގެން ދިޔަ މި މެޗުގައި ދެން ގޯލެއް ފެނުނީ 90 ވަނަ މިނެޓުގައެވެ. މާފުށިން ހިލޭ ޖެހުމެއްގައި ނަގައިދިން ބޯޅަ އޭދަފުށިން ކުރިޔަށް ފޮނުވާ ނުލެވި، މާފުށީގެ ދެވަނަ ލަނޑު އެ ޓީމަށް ކާމިޔާބު ކޮށްދިނީ އިސްމާއީލް މަފާޒެވެ. އޭދަފުށީ ކީޕަރު ޑަބަލް ސޭވް ކުރި ނަމަވެސް، ރީބައުންސްގައި ކުޑަ އޭރިޔާ ކުރިމަތިން މަފާޒަށް ލިބުނު ބޯޅަ ގޯލަށް ފޮނުވާލީ ކީޕަރު ކައިރިން ނައްޓާފަ އެވެ.
މިއީ ގޯލްޑް ކަޕުގައި އޭދަފުށިން މޮޅު ނުވި ފުރަތަމަ މެޗެވެ. ގުރޫޕު ސްޓޭޖު ފުރަތަމަ ބައިގައި އޭދަފުށި ތިން މެޗުން އެގާރަ ލަނޑުޖެހި ނަމަވެސް، މިރޭ މާފުށިން ވަނީ އޭދަފުށީގެ ހަމަލާތައް ކާމިޔާބު ކަމާއެކު ދިފާއުކޮށްފައެވެ.
މި ގްރޫޕުގެ މެޗެއް ދެން ކުޅޭނީ ބުދަ ދުވަހުގެ ރޭގަނޑު އެވެ. ހއ. ދިއްދޫ އާ މާފުށި ކުރިމަތިލާ އިރު، އެމެޗުން އެއްވަރުވިޔަސް ކުއާޓާ ފައިނަލުގެ ޖާގަ މާފުށްޓަށް ޔަގީން ވާނެ އެވެ. މި ގުރޫޕުގެ ފަހު މެޗު، އޭދަފުށި-ދިއްދޫ، ކުޅުމަށް ހަމަޖެހިފައި ވަނީ އަންނަ ހޮނިހިރު ދުވަހު ހަވީރު އެވެ.
