Ansar Ibrahim
ކުޅުދުއްފުށީގައި ބާއްވަން ހަމަޖެހިފައިވާ ހޭންޑްބޯޅަ ގައުމީ ޓީމުގެ ސިލެކްޝަނާ ގުޅިގެން އުފެދިފައިވާ ހިޔާލުތަފާތުވުންތަކާ އެކު ވެސް ކުޅުދުއްފުށިން ތިބީ ސިލެކްޝަންގައި ބައިވެރިވާ އެންމެންނަށް ވެސް މަރުހަބާ ކިޔަން ފުރިހަމައަށް ތައްޔާރުވެގެންނެވެ.
އޭޝިއަން ހޭންޑްބޯޅަ ފެޑެރޭޝަންގެ އެހީއާ އެކު، ބޭރު ކޯޗަކު ހަމަޖައްސައިގެން ތަމްރީނު ކޮށްގެން ހޭންޑްބޯލް މޯލްޑިވްސް އިން ތައްޔާރުވަނީ އަންނަ އަހަރުގެ ފެބްރުއަރީ 16 ގައި ޕާކިސްތާންގައި ބާއްވާ މުބާރާތަކަށެވެ.
ކުޅުދުއްފުށީ ސިޓީ ކައުންސިލުން ތިބީ ހޭންޑްބޯލް މޯލްޑިވްސް އިން އެދޭ ކޮންމެ ކަމެއް އެންމެ ފުރިހަމައަށް ކޮށްދިނުމުގެ އަޒުމުގަ އެވެ. ސިޓީ ކައުންސިލްގެ މޭޔަރު މުހައްމަދު އާތިފްގެ ފޭސްބުކް ޕޯސްޓުގައި ލިޔެފައި ވަނީ، ފަރިތަކުރުންތަކުގައި ބައިވެރިވާން ބޭނުންވާ ކުޅުންތެރިންނަށް މާލޭގައި ހުރުމާއި ކެއުމަށް ހޭދަކުރަން ޖެހޭ ވަރަށް ވުރެ ހަރަދު ކުޑަކޮށް ކުޅޫދުއްފުށީގައި އެ ކަންކަން ހަމަޖެހޭނެ ކަމަށެވެ.
އަދި މި ކުޅިވަރަށް އެންމެ އެކަށީގެންވާ ކޯޓެއް ކުޅުދުއްފުށީގައި އޮވެމެ، ނިސްބަތުން މޮޅު ކުޅުންތެރިން ކުޅުދުއްފުށީގައި ތި ކަމަށާއި އަދި ކުޅުދުއްފުށީގައި ސިލެކްޝަން ކުރިއަށް ގެންދަން އެސޯސިއޭޝަނުން ނިންމި ނިންމުމަކީ ކުޅިވަރު ކޮމިއުނިޓީ އަށް އެންމެ އިންސާފުވެރި ނިންމުން ކަމަށް ދެކޭ ކަމަށެވެ.
ކުޅުދުއްފުށީގައި ސިލެކްޝަން ބާއްވާތީ ބައެއް ކޯޗުންނާއި ކުޅުންތެރިންގެ ހިތްހަމަނުޖެހުން ފާޅު ކުރި ނަމަވެސް، ކުޅުދުއްފުށްޓަކީ ހޭންޑްބޯޅައިގެ ގިނަ ހަރަކާތްތަކެއް ހިންގަމުން އަންނަ ރަށެކެވެ. އެގޮތުން 2019 ވަނަ އަހަރުން ފެށިގެން ބީޗް ހޭންޑްބޯޅަ މުބާރާތްތައް ވެސް ކުޅުދުއްފުށީގައި އަންނަނީ ބާއްވަމުންނެވެ.
އެގޮތުން މުޅި ރާއްޖެއަށް ހުޅުވާލައިގެން ބާއްވާ ބީޗް ގޭމްސްގެ އިތުރުން، ހޭންޑްބޯޅަ އެސޯސިއޭޝަނާ ގުޅިގެން ބާއްވާ އިންޓަ އޮފީސް ބީޗް ހޭންޑްބޯޅަ މުބާރާތްތައް ފާހަގަ ކޮށްލެވެ އެވެ.
ހަމައެއާ އެކު ބީޗް ހޭންޑްބޯޅަ ރެފްރީ ކޯސް ފުރިހަމަ ކޮށް އިންޓަރނޭޝަންލް ކޮލިފައިޑް ތިބި ރާއްޖޭގެ ހަމައެކަނި ދެ ރެފްރީންނެވެ އެވެ. އެއީ އަބޫބަކުރު އަލީ އާއި އަބްދުالله ޝަމީމް އެވެ. މީގެ އިތުރުން ވެސް ކުޅުދުއްުށީގައި ގިނަ ހޭންޑްބޯޅަ ރެފްރީން ތަމްރީނު ވެފައި އެބަތިއްބެވެ.
ކުޅުދުއްފުށީގައި ކުޅޭ ކުޅުންތެރިއެއް ކަމަށްވާ މުހައްމަދު އިހުސާން “ސިޑިބަރި” އާ ވާހަކަ ދައްކަމުން ބުނީ، ކުޅުދުއްފުށީގައި ހިންގާ ހަރަކާތްތަކަކީ ނުވާ ކަންކަން ކަމަށް ހަދައިގެން ސޮފީ ކޯޗް ވާހަކަ ދެއްކުމަކީ ކަންބޮޑުވާ ކަމެއް ކަމަށާއި، އޭގެ ސަބަބުން، ކުޅުދުއްފުށީގައި ބާއްވާ މުބާރާތްތަކުގެ އަގު ވަޒަން ނުކުރާކަމުގެ އިހުސާސް ކުރުވާ ކަމަށެވެ.
“ސޮފީ ކޯޗް އެހެން ބުނުމުން ފާހަގަވަނީ ކުޅުދުއްފުށީގައި މި ކުޅިވަރު ކުރިއަރުވަން މަސައްކަތް ކުރާ މީހުންގެ ވެލިއު ދަށްކޮށްލާ, ކްރެޑިބިލިޓީ ދަށްކޮށްލަން ކުރި މަސައްކަތެއްގެ ގޮތުގައި. އެކަމާ ވަރަށް ދެރަވެ އަދި ކޮންސާން ވެސް ވޭ.” ކުޅުދުއްފުށީގައި ސިލެކްޝަން ބާއްވާތީ ކަންބޮޑުވުން ފާޅުކުރި މަގުބޫލު ހޭންޑްބޯޅަ ކޯޗް އަލީ ސޮފީހު (ސޮފީ ކޯޗު) ގެ ހިޔާލާ ގުޅޭގޮތުން އިހުސާން ބުންޏެވެ.
“ތަނެއްގެ ބިންގާ އަޅާފައިވާ ތަނެއްގެ މައްޗަށް، ކަމެއް ނުވަތަ އެއްޗެހި ތަކެއް ޑިވެލެޕްކުރުން މާ ބުއްދިވެރި ވާނެ އިތުރަށް ތަނެއްގައި ފެށުމުގެ ބަދަލުގައި. ހަރަދާއި އަދި އެހެނިހެން ކަންކަމަށް ބެއްޔަސް އެކަން ފަސޭހަވާނެ. މިސާލަކަށް މާލެއަށް ސެލެކްޝަން ބަދަލުކޮށްގެން ހަމަ މާލޭ ކުދިން ކުޅުދުއްފުއްޓަށް އައިސް ވާ ދަތިކަން، ކުޅުދުއްފުށީ ކުދިން މާލެ ގޮސްގެން ވެސް ވާނެ ނޫންތޯ. ހަ އަހަރު ވަންދެން ކުުޅުދުއްފުށީގައި ހުއްޓުމެއް ނެތި ރަނގަޅު ފެންވަރަކަށް ބީޗް ހޭންޑްބޯލް ކުޅެމުން އައި ބަޔަކު، ވަޒީފާ އާއި މި ހުރިހާ ކަމެއް ހުއްޓާ ހަރަދުތަކެއް ކޮށް މާލެއަށް ގޮސްގެން ދިމާވާނީ ހަމަ އެއްކަމެއް. މިއީ މި ކޮޅުގައި ތިބޭ ކުޅުންތެރިންނަށް ލިބޭ އެންމެ ފުރުސަތެއް ދޯ ހަމަ.”
އިހުސާން ބުނީ، މުޅި ރާއްޖެއަށް ބެއްޔަށް ބީޗް ހޭންޑްބޯޅަ ހަރަކާތްތައް އެންމެ ގިނައިން ހިންގާ ދެވަނަ ރަށެއް ނޯންނާނެ ކަމަށާއި، މިއާ އެކު ބީޗް ހޭންޑްބޯޅަ އޮތީ ކުޅުދުއްފުށީގެ ސަގާފަތާ ވެސް ވަރަށް ބޮޑަށް ގުޅިފައި ކަމަށެވެ. އަދި ކުޅުދުއްފުށީގައި ބާއްވަން ހަމަޖެހިފަިވާ ގައުމީ ސިލެކްޝަނެއް މާލެ ބަދަލުކޮއްފި ނަމަ އެއީ 6 އަހަރު ވަންދެން ހުއްޓުމެއް ނެތި ކުޅެމުން އައި ކުޅުންތެރިންނަށް ވެސް ދެވޭ ދެރައެއް ކަމަށެވެ.
އަދި ކުޅުދުއްފުށީ ސަރަހައްދުގައި ބީޗް ހޭންޑްބޯޅަ ގިނަ މުބާރާތްތަކެއް ބާއްވާއިރު، ހަމައެކަނި ކުޅުދުއްފުށީގައި ވެސް 100 އާ ގާތްކުރާ އަދަދަކަށް ހޭންޑްބޯޅަ ކުޅުންތެރިން އެބަތިބި ކަމަށް އިހުސާން ބުންޏެވެ.
“ވަރަށް ބޮޑު ކޮންސާނެއް، ހަ އަހަރަށްވުރެ ގިނަ ދުވަސް ވެއްޖެ މި ކުޅިވަރު ތަރައްގީ ކުރަން މަސައްކަތް ކުރާތާ. މުބާރާތަކަށްފަހު މުބާރާތެއް ބާއްވާތާ. އެއާއެކު މި ރާއްޖޭގައި ބީޗް ހޭންޑްބޯލް ތަރައްގީކޮށް ކުރިއެރުވުމުގެ ވަރަށް ބޮޑު އިންސައްތައެއްގެ ކްރެޑިޓް [ދޭން ޖެހޭ]، މި ކުޅުދުއްފުއްޓާއި، މި ރަށުގެ ކުދިން ކުރި މަސައްކަތް ބަލައިގަންނަން ޖެހޭނެ. އަަދި އެ ކަންތައް ޑިސްކްރެޑިޓް ކޮށްފައި ހުރުމުން، ވަރަށް ކޮންސާންވޭ، ހާއްސަކޮށް ހޭންޑްބޯލްގައި ރެސްޕެކްޓަބަލް ކޯޗުން އެ ވާހަކަ ދެއްކީމާ މާ ބޮޑަށް ކޮންސާންވޭ،” އިހުސާން ފާހަގަކުރިއެވެ.
“މާލޭން އަދި އެނޫން ތަންތަނުން ވެސް ކުޅުދުއްފުއްޓަށް މި ސެލެކްޝަނަށް އަންނަ ކުދިންނަށް، ވީ އެންމެ ރަނގަޅަށް އެއްބާރުލުމާއި އެހީތެރިކަމެއް ދޭނަން އަޅުގަނޑުމެންގެ ފަރާތުން. މިހާރު ވެސް ބައެއް ކުދިން ގުޅައިގެން އެބަ މަސައްކަތް ކުރޭ ހުރުމާއި ކެއުމުގެ އިންތިޒާމުތައް ހަމަ ޖެއްސުމަށް. އަޅުގަނޑުމެން ވެސް ބޭނުންވަނީ ގައުމީ ޓީމެއް އެކުލަވާލެވިގެން ދާއިރު، ގައުމު ތަމްސީލުކުރާނެ އެންމެ ވަރުގަދަ ޓީމެއް އެކުލަވާލެވި، ބީޗް ހޭންޑްބޯލްއިން ގައުމު އުފާވާ ފަދަ ކާމިޔާބީތަކެއް ލިބުން.”
