Ali Thameem
ރާއްޖޭގައި ކުޅެވޭ އެންމެ ބޮޑު އެއް ފުޓްސަލް މުބާރާތް ކަމުގައިވާ ރިސޯޓު ސުޕަ ލީގުގެ ޗެމްޕިއަންކަން މި އަަހަރުވެސް ޖޯލި މޯލްޑިވްސް އިން ހޯދައިފި އެވެ.
ޖޯލި މޯލްޑިވްސް ފައިނަލު މެޗުގައި ވާދަކުރީ އުތުރު-މާލެ ޒޯންގެ ޗެމްޕިއަން ބަނޑޮސް މޯލްޑިވްސް އާއެވެ. ޖޯލިން ދެލަނޑު ޖަހާ މެޗު ކާމިޔާބުކުރީ ބައިކޮޅަށް ލަނޑެއް ވަނަ ނުދީ އެވެ. ފައިނަލަށް ޖޯލި ދަތުރުކުރީ ސެމީ ފައިނަލުގައި އަރި ޒޯނު ޗެމްޕިއަން ކޮންރެޑު މޯލްޑިވްސް ބަލި ކޮށްގެނެވެ.
ރ.ޒޯނުގެ ޗެެމްޕިއަން ޖޯލި ސުޕަ ލީގު ފެށީ އެންމެ އެދެވޭ ނަތީޖާ އަކުން ނޫޫނެވެ. ބ.އަތޮޅުގެ ޗެމްޕިއަން އަނަންަތަރާ ކިހަވައް ވަނީ ފުރަތަމަ މެޗު ކާމިޔާބުކޮށްފަ އެވެ. ނަމަވެސް މި ކުރިމަތިލުމުގެ ދެވަނަ ފައިކަށީގައި ޖޯލި ވަނީ ނަތީޖާ އަނބުރާލައިފައެވެ.
ރަނަރަޕް ބަނޑޮސް މޯލްޑިވްސް ސުޕަލީގު ފެށީ އަވަށްޓެރި ދެކުނު މާލެ ޒޯނުގެ ޗެމްޕިއަން ސަން ސިޔާމް އޮޅުވެލި މައްޗަށް ކުރިހޯދައިގެނެވެ.
ނިމިދިޔަ އަހަރު ސުޕަލީގު ފައިނަލުގައި ޖޯލި ކުރިމަތިލީ ކްރޮސްރޯޑްސް މޯލްޑިވްސް އެވެ. އެފަހަރުވެސް މާލެ އަތޮޅުން އަތުވި ޓީމުގެ މައްޗަށް ޖޯލި ކުރިހޯދި އެވެ.
މި އަހަރުގެ މުބާރާތުގެ މޮޅު ކުޅުންތެރިޔަކަށް ހޮވިފައިވަނީ، ފައިނަލް މެޗުގެ މޮޅު ކުޅުންތެރިޔާ މަޤާމު އަދި އެންމެ ގިނަ ލަނޑުޖެހި ކުޅުންތެރިޔާގެ މަޤާމުވެސް ހޯދި މުސްލިމް މުޙައްމަދެވެ. މުސްލިމް ވަނީ މިދިޔަ އަހަރުގެ ކާމިޔާބަށް ވާސިލުވުމުގައިވެސް މޮޅު ކުޅުމެއް ދައްކާފައެވެ.
މުބާރާތުގެ މޮޅު ކޯޗުގެ ލަޤަބު ހޯދާފައިވަނީ 2023 ގައި ވެސް ޖޯލި މޯލްޑިވްސް ރިސޯޓު ފުޓްަސަލްގެ އެންމެ އުހަށް ގެންގޮސްދިން، ދިވެހި ފުޓުބޯޅާގެ ލެޖެންޑެއް ކަމުގައިވާ އަބްދުﷲ ޙަނީފު – އާންމު ނަމުންނަމަ ބެންޖޯ އެވެ.
