ރިސޯޓު ލީގު: އަނަންތަރާ ކިހަވައް މޯލްޑިވްސް އިން ބ. ޒޯނުގެ ޗެންޕިއަންކަން ހޯދައިފި

ފައިނަލް މެޗުގައި ހޯސްޓުކުރި ފޯ ސީޒަންސް ލަނޑާގިރާވަރު ބަލިކޮށް އަނަންތަރާ ކިހަވައް މޯލްޑިވްސް އިން ރިސޯޓު ލީގުގެ ބ. ޒޯނުގެ ޗެމްޕިއންކަން ހޯދައިފި އެވެ.

އަނަންތަރާ އިން ފައިނަލް މެޗު ކާމިޔާބުކުރީ 1-0 އިންނެވެ. އެޓީމު ފައިނަލަށް ދަތުރުކުރީ ސެމީ ފައިނަލްގައި ބުދަ ދުވަހު މިލައިދޫ މޯލްޑިވްސް ބަލިކޮށްފަ އެވެ.

މުބާރާތް ހޯސްޓު ކުރި ލަނޑާގިރާވަރުން ވަނީ ބުދަ ދުވަހު އޮތް ސެމީ ފައިނަލްގައި ގްރޫޕް ބީގެ އެއްވަނައިގައި ދިޔަ ޓީމު ފިނޮޅު 3-2 އިން ބަލިކޮފަ އެވެ.

ޒޯންގެ އެންމެ މޮޅު ކުޅުންތެރިޔާގެ އެވޯޑް ހޯދީ އަނަންތަރާގެ ރަޝާދު އަބްދުލް މަތީން އެވެ. އޭނާ ވަނީ ހަ ގޯލު ޖަހައި، ގިނަ މެޗުތަކުގައި މޮޅު ކުޅުންތެރިޔާގެ އެވޯޑް ވެސް ހޯދައިފަ އެވެ.

މިއަހަރުގެ ރިސޯޓު ލީގުގައި މިހާތަނަށް އެންމެ ގިނަ ޓީމު ބައިވެރިވެފައިވަނީ ބ. ޒޯނުގަ އެވެ. މި ޒޯނުގައި 10 ރިސޯޓު ވާދަކޮށްފައިވެ އެވެ.

ރިސޯޓު ލީގު 2024 ފެށީ ނޯތު މާލެ ޒޯނުންނެވެ. އޭގެ ފަހުން ދ. ޒޯން އަދި އަރި ޒޯން ވެސް ވަނީ ނިމިފަ އެވެ.

ބ. ޒޯނަށް ފަހު ދެން އޮތީ ރ. ޒޯނެވެ. އެ ޒޯންގެ ގްރޫޕް ސްޓޭޖްގެ މެޗުތައް އާދިއްތަ ދުވަހު ފަށާނެ އެވެ.