Ansar Ibrahim
މިނިސްޓްރީ އޮފް ސްޕޯޓްސް، ފިޓްނަސް އެންޑް ރެކްރިއޭޝަނުން ގްރޭޓާ މާލެ ސަރަހައްދުގައި ރޭސިން ޓްރެކަކާއި ޑްރިފްޓް އެރީނާއެއްގެ އިތުރުން ސާފިން އާއި ބޮޑީބޯޑިން ސްޓޭޑިއަމެއް ތަރައްގީކުރުމުގެ މަސައްކަތް ކުރަމުން ދާ ކަން ހާމަކޮށްފި އެވެ.
މިނިސްޓްރީން ވަނީ ހޮންގް ކޮންގުގެ ރޯޓައިމް އިންޖިނިއަރިންގ އެންޑް ޓެކްނޮލޮޖީއާއެކު ސާފިން އަދި ބޮޑީބޯޑިން ސްޓޭޑިއަމެއް ތަރައްގީކުރުމަށް އެމްއޯޔޫއެއްގައި ސޮއިކޮށްފައެވެ.
މިއަދު މިނިސްޓްރީއާއި އެޗްޑީސީއާ ދެމެދު ރޭސިން އަދި ޑްރިފްޓް އެރީނާއަށް ބިން ހަމަޖެއްސުމަށް އެމްއޯޔޫއެއްގައި ސޮއިކުރެވުނެވެ.
ރޭސިން އަދި ޑްރިފްޓިން އަކީ ޒުވާނުންގެ މެދުގައި މަގުބޫލު ކުޅިވަރުތަކެކެވެ. ރޭސިން ޓްރެކެއް ނެތް ނަމަވެސް، ކުރީގައި ހުޅުމާލޭގެ މަގުތަކުގައި ރޭސިން މުބާރާތްތައް ބާއްވާފައިވެ އެވެ.. ރޭސިން ކޮމިއުނިޓީން ވަނީ ޓްރެކެއް ނެތުމުގެ ކަންބޮޑުވުން ކުރީގެ ސަރުކާރުތަކާވެސް ހިއްސާކޮށްފައެވެ.
“ޒުވާނުން ވަރަށް ގިނަ ދުވަހު މިކަމަށް އެދެމުން އައީ. އިރާދަކުރެއްވިއްޔާ މިއަހަރު މަގު ފަހިވެގެން ދާނެ،” މިނިސްޓަރ ރާފިއު ވިދާޅުވިއެވެ.
މިނިސްޓަރު ވިދާޅުވި ގޮތުގައި ބޮޑީބޯޑިން އަދި ސާފިން ސްޓޭޑިއަމެއްގެ މައިގަނޑު މަގްސަދަކީ ބައިނަލްއަގުވާމީ މުބާރާތްތައް ބޭއްވުމުގައި ދިމާވާ ދަތިތައް ހައްލުކުރުމެވެ.
އިންޓަރނޭޝަނަލް ބޮޑީބޯޑިން ކޯޕަރޭޝަން (އައިބީސީ)ގެ ވޯލްޑް ޓުއާގެ ކަލަންޑަރުގައި “ވިޒިޓް މޯލްޑިވްސް ޕްރޯ” ފުރަތަމަ ފަހަރަށް ހިމެނުނީ 2022 ގައެވެ. އަދި މިދިޔަ އަހަރުވެސް މި މުބާރާތް މާލޭގެ ވަރުނުލަ ރާޅުގަނޑުގައި ބޭއްވި އެވެ.
މީގެ އިތުރުން، މިދިޔަ އަހަރު ކ. ތުލުސްދޫގައި އޭޝިއަން ސާފިން ޗެމްޕިއަންޝިޕް ބޭއްވި އެވެ.
މިނިސްޓަރު އިތުރަށް ވިދާޅުވީ، ރޭސިން އަދި ޑްރިފްޓް އެރީނާގެ ކޮންސެޕްޓާއި ޑިޒައިން، އަދި ހަމައެހެންމެ ސާފިން އާއި ބޮޑީބޯޑިން ސްޓޭޑިއަމްގެ ކޮންސެޕްޓާއި ޑިޒައިން ވެސް، ހަތަރު އެސޯސިއޭޝަނާ މަޝްވަރާކުރެވިގެން ނިންމާލެވިފައިވާ ކަމަށެވެ.
