Ansar Ibrahim
ފުޓްބޯޅަ އެސޯސިއޭޝަން އޮފް މޯލްޑިވްސް (އެފްއޭއެމް) އިން އިޢުލާނުކުރި ޓެކްނިކަލް ވަޒީފާތަކަށް 600 އަށްވުރެ ގިނަ އެޕްލިކޭޝަން ހުށަހަޅައިފި ކަމަށް އެސޯސިއޭޝަނުން ބުނެފި އެވެ.
މާލީ ދަތިތަކާ ކުރިމަތިލަމުންދާ އެސޯސިއޭޝަނުން ވޭތުވެދިޔަ މަހު 13 ޓެކްނިކަލް މަގާމަށް ބައިނަލްއަގުވާމީ ޕްލެޓްފޯމެއް ކަމަށްވާ “ޖޮބްސް4ފުޓްބޯލް” މެދުވެރިކޮށް ވަޒީފާގެ ފުރުސަތަށް ހުޅުވާލި އެވެ. ޖޮބްސް ފޯ ފުޓްބޯލްގައި އިއުލާނުކޮށްފައިވާ ވަޒީފާތަކަށް އެޕްލިކޭޝަން ހުށަހެޅުމުގެ ސުންގަޑިއަކީ އަންނަ މަހުގެ 13 އެވެ.
އެސޯސިއޭޝަނުން ދެކޭގޮތުގައި މިހާ ގިނަ އަދަދެއްގެ މީހުން، ތިން ހަފްތާގެ ތެރޭގައި، ޓެކްނިކަލް މަގާމުތަކަށް ކުރިމަތިލާފައިވުމަކީ ފުޓްބޯޅަ ކުރިއެރުވުމަށް ކުރެވޭ މަސައްކަތްތަކަށް ލިބުނު ރަނގަޅު ކުރިއެރުމެކެވެ.
އެސޯސިއޭޝަންގެ ޓެކްނިކަލް ޑިރެކްޓަރު ޕޯލް ތޮމަސް ސްމޯލީ ވިދާޅުވީ ގިނަ ބައިނަލްއަގުވާމީ ހުށަހެޅުން ލިބިފައިވާތީ އުފާވާ ކަމަށެވެ.
އެފްއޭއެމްއިން ގިނަ މަގާމުތަކެއް އިއުލާން ކޮށްފައި ވާއިރު، ފީފާއިންވަނީ ތަރައްގީގެ ފަންޑުތައް އެސޯސިއޭޝަންއަށް ދިނުން ހުއްޓުވާފަ އެވެ.
ވޭތުވެދިޔަ މަހާ ހަމައަށް އެސޯސިއޭޝަނުން މުސާރައިގެ ގޮތުގައި ގިނަ އަދަދެއްގެ ފައިސާ މުވައްޒަފުންނަށް ދީފައި ނުވެ އެވެ. މުސާރަ ނޫން އެހެން ކަމަކަށް ހަރަދު ނުކުރުމުގެ ޝަރުތާ އެކު ފީފާއިން އެފްއޭއެމްއަށް 381،000 ޑޮލަރު ދޫކޮށްފައިވެ އެވެ.
