Ansar Ibrahim
ވެލެންސިއާ ޖޫނިއާ ޓީމަށް އެފްއޭއެމްގެ ޓާފް ދަނޑު ބޭނުންކުރުން މަނާކުރުމުން، ކުޅިވަރު ވުޒާރާއިން އެ ޓީމު ޕްރެކްޓިސް ކުރުމަށް ހެންވޭރު ސްޓޭޑިއަމް ހަމަޖައްސައިދީފި އެވެ.
ވެލެންސިއާ އަށް އެފްއޭއެމްގެ ޓާފް ދަނޑު ބޭނުން ކުރުން އެ އެސޯސިއޭޝަނުން މަނާކޮށްފައި ވާއިރު، އެފްއޭއެމްގެ ޑިސިޕްލިނަރީ ކޮމިޓީން ވެލެންސިއާގެ ލީޑާޝިޕް ސަސްޕެންޑް ކުރީ މި މަހު އެވެ.
ވެލެންސިއާގެ 16 އަހަރުން ދަށުގެ ޓީމުން ވަނީ އަންނަ ޖޫން މަހު ތައިލެންޑުގައި ބާއްވާ ޔޫތު މުބާރާތަކަށް ތައްޔާރުވާން ފަށައިފައެވެ.
އެފްއޭއެމްގެ ބެލުމުގެ ދަށުގައި އޮންނަ މާފަންނު ސްޓޭޑިއަމްގެ ހުޅަނގުގައި އޮންނަ ދެ ޓާފް ދަނޑު ވެސް ފުޓްބޯޅަ އެކަޑަމީތަކާއި ޖޫނިއާ ޓީމުތަކުން ބޭނުންކުރެއެވެ. އެފްއޭއެމުން ވަނީ ޓާފް ދަނޑު ބޭނުން ނުކުރުމަށް ވެލެންސިއާ އަށް ސިޓީއެއް ފޮނުވާފައެވެ.
ނަމަވެސް ކުޅިވަރާ ބެހޭ ވުޒާރާގެ ބެލުމުގެ ދަށުގައި އޮތް ހެންވޭރު ސްޓޭޑިއަމްގައި އެޓީމުން މިހާރު އަންނަނީ ފަރިތަކުރަމުންނެވެ.
ވެލެންސިއާ އިން ވަނީ ސަސްޕެންޝަން އިސްތިއުނާފުކޮށްފަ އެވެ. އެފްއޭއެމުން ކްލަބް ސަސްޕެންޑް ކުރި ނަމަވެސް އެ ކްލަބުގެ މިހާރުގެ ލީޑާޝިޕް ސްޕޯޓްސް ކޮމިޝަނުން ބަލައިގަނެއެވެ.
