ލަތީފް އަލުން ވީއޭއެމްގެ ރައީސް ކަމަށް

ވީއޭއެމްގެ ރައީސްގެ މަގާމަށް މުހައްމަދު ލަތީފް އައްޔަނު ކޮށްފި އެވެ.

ވީއޭއެމްގެ ރައީސަކަށް ލަތީފް ރަސްމީކޮށް ހަމަޖެއްސީ މިދިޔަ މަހުގެ 26 ވަނަ ދުވަހު އެ އެސޯސިއޭޝަނުން ބޭއްވި “އެކްސްޓްރާ އޯޑިނަރީ ކޮންގްރެސް” ގައެވެ. އޭނާ ވަނީ މީގެ ކުރިން 2019 ވަނަ އަހަރުން ފެށިގެން 2021 ވަނަ އަހަރާ ހަމައަށް އެ މަގާމު ފުރުއްވާފައެވެ.

ވީއޭއެމްގެ އިސްލާހު ކޮށްފައިވާ އޮޕަރޭޓިން ޕޮލިސީގައިވާ ގޮތުން އެކްސްކޯގެ މަގާމަކަށް ކުރިމަތިލާ ކޮންމެ ކެންޑިޑޭޓަކު ވާދަނުކޮށް ގޮސްފިނަމަ އޮޓަމެޓިކުން އިންސްޓޭޓް ވާނެއެވެ. އެހެންކަމުން ކޮންގްރެސް ބާއްވާ ތާރީޚުގެ ކުރިން އާ ރައީސް ވަނީ ކަށަވަރުވެފައެވެ.

ވީއޭއެމްގެ ރައީސްގެ ހުސްވެފައިވާ ގޮނޑި ފުރުމަށް ލަތީފް އިސްނެންގެވީ މުހައްމަދު ރަނޭޝް ވަކިވުމާ ގުޅިގެންނެވެ.

ކޮންގްރެސްގައި އެކްސްކޯއަށް އިތުރު އަށް މެންބަރުން ހޮވި އިރު، އޭގެ ތެރޭގައި އާ ހަތަރު ނައިބު ރައީސުން ވެސް ހިމެނެއެވެ. އެކްސްކޯއަށް އަލަށް އައްޔަންކުރާ ހުރިހާ މެންބަރުންނަކީ އެއް އަހަރު ދުވަހުގެ ދައުރެކެވެ.