Ansar Ibrahim
އަންނަ މަހު ބާއްވަން އެފްއޭއެމްގެ އިންތިޚާބު ފަސްކުރަން ފީފާއިން އަންގައިފި އެވެ.
އެފްއޭއެމްގެ އެކްޓިން ޖެނެރަލް ސެކްރެޓަރީ މުހައްމަދު ޖައުޝަން ޝަރީފް ނޫސްވެރިންނަށް މައުލޫމާތު ދެއްވަމުން ވިދާޅުވީ ފީފާގެ އެންގުމާ އެއްގޮތަށް އިންތިހާބުގެ ކަންކަން ފަސްކޮށްފައިވާ ކަމަށެވެ. އެފްއޭއެމްގެ މީޑިއާ ގުރޫޕަށް ފޮނުއްވި މެސެޖެއްގައި ޖައުޝަން ވިދާޅުވީ މި މަޝްވަރާގެ ތެރެއިން ފީފާ އާއި އޭއެފްސީގެ އެދުމުގެ މަތިން މިވަގުތު އޮތް ގޮތަށް އިންތިހާބުގެ ކަންކަން މަޑުޖައްސާލާނެ ކަމަށެވެ.
“އެފްއޭއެމްއިން އަޅުގަނޑުމެންގެ މެމްބަރުންނަށާއި ރައްޔިތުންނަށް ޔަގީންކަން އަރުވަނީ އެ ކަންބޮޑުވުންތަކަށް ހައްލެއް ހޯދައިދިނުމުގައި ފީފާ އާއި އޭއެފްސީއަށް ފުރިހަމަ އެއްބާރުލުން ދޭނެ ކަމުގެ ޔަގީންކަން،” ޖައުޝަންގެ މެސެޖުގައި ވެއެވެ.
“އެފްއޭއެމްގެ ސެކްރެޓޭރިއަޓުން އަބަދުވެސް ފުޓްބޯޅައިގެ ރޫހާއި ހިންގުމުގެ އުސޫލުތައް ހިމާޔަތް ކުރާނެ.”
މިއީ އެފްއޭއެމްގެ އިންތިހާބާ ގުޅިގެން ފީފާއިން ނެރުނު ދެވަނަ ނޯޓިސް އެވެ. މިދިޔަ ޖެނުއަރީ މަހުގެ 31 ވަނަ ދުވަހު ބޭއްވި އިންތިހާބު ކެންސަލް ކުރަން ފީފާއިން އެންގީ އެފްއޭއެމުން ބައެއް ކޮމިޓީތައް އެކުލަވާލާފައި ނުވާތީއެވެ.
އެފްއޭއެމުން ކޮމިޓީތައް ނުއުފައްދާތާ ހަތަރު އަހަރު ވެއްޖެ އެވެ. އެކަން އެނގުނީ އަހުމަދު ތޯރިގު (ޓޮމް) ގެ ކެނޑިޑެންސީ ބާތިލް ކުރަން އިލެކްޓޯރަލް ކޮމިޓީން ނިންމި އިރު، އިލެކްޓޯރަލް އެޕީލް ކޮމެޓީއެއް ނެތުމުންނެވެ.
އެފްއޭއެމްގެ ކޮންގްރެސް އެއް މިދިޔަ ފެބްރުއަރީ މަހު ބޭއްވިއިރު، އިންތިހާބުގެ މަރުހަލާ މެދުކަނޑާލުމަށް ފަހު ފީފާއިން ކޮމިޓީތައް އެކުލަވާލަން އެންގިއެވެ.
މިފަހަރު ފީފާއިން އިންތިޚާބު ފަސްކުރަން އަންގާފައިވަނީ ވެލެންސިއާ އަށް ކޮންގްރެސްއަށް ދައުވަތު ދީފައި ނުވާތީއެވެ.
