ކޯޅުންތަކަށްފަހު އެފްއޭއެމުން އިންތިހާބު ބާއްވާނެ ތާރީހެއް އިއުލާން ކޮށްފި

ވެލެންސިއާ ސަސްޕެންޑް ކުރުމަށް ފަހު އެފްއޭއެމުން ވަނީ އަންނަ އޭޕްރީލް މަހުގެ 20 ވަނަ ދުވަހު އެ އެސޯސިއޭޝަންގެ އިންތިހާބު ބާއްވަން ނިންމައިފައެވެ.

އެފްއޭއެމްގެ އެގްޒެކެޓިވް ކޮމިޓީގެ އިއްޔެގެ ބައްދަލުވުމަށް ފަހު އެ އެސޯސިއޭޝަނުން ނެރުނު ބަޔާނެއްގައި ބުނެފައި ވަނީ އެފްއޭއެމްގެ އިންތިހާބު އޮންނާނީ 20 އޭޕްރީލް 2024 ވާ ހޮނިހިރު ދުވަހު ކަމަށެވެ. އަދި މަގާމުތަކަށް ކުރިމަތިލާ ފަރާތްތަކުން 16 މާޗް 2024 ވާ ހޮނިހިރު ދުވަހުގެ 14:00 ގެ ކުރިން އެސޯސިއޭޝަނަށް ހުށަހަޅަން ޖެހޭނެ ކަމަށް ވެސް ބަޔާނުގައި ވެއެވެ.

ވެލެންސިއާގެ ކޮންޓްރޯލް ހޯދުމަށް އެފްއޭއެމްގެ ރައީސް ބައްސާމް އަދީލް ޖަލީލް ކުރެއްވި ހުރިހާ މަސައްކަތެއް ނާކާމިޔާބުވުމުން، އެ ކްލަބް މިހާރު ވަނީ ސަސްޕެންޑްކޮށްފައެވެ.

ފުރަތަމަ އިންތިހާބު ޖެނުއަރީ މަހު ބާއްވަން އެފްއޭއެމުން ނިންމިއިރު، ވެލެންސިއާ އަކީ އެ އިންތިހާބު ކެންސަލްކުރި މައިގަނޑު ސަބަބެވެ. އެފްއޭއެމްގެ ކުރީގެ ރައީސް އަހުމަދު ތޯރިގު (ޓޮމް) އާއި އީގަލްސްގެ ވައިސް ޗެއާމަން މުފާވިޒް ހާޝިމް (މުފާ) އަށް ވެސް ވެލެންސިއާއިން ވަނީ ތާއީދުގެ ލިޔުން ދީފައެވެ. ތޯރިގުގެ ކެނޑިޑެންސީ ބާތިލް ކުރަން ޖެހުނީ ފުރަތަމަ ޑިވިޝަނުގެ މަދުވެގެން ތިން ކްލަބެއްގެ ސަޕޯޓް ލެޓަރތައް އޭނާގެ އަތުގައި ނެތުމުންނެވެ.

ތޯރިގް ވަނީ ކެނޑިޑެންސީ އިސްތިއުނާފު ކުރައްވާފައެވެ. ނަމަވެސް އެފްއޭއެމްގައި އިންތިޚާބީ އިސްތިއުނާފު ކޮމިޓީއެއް ނެތުމުން ފީފާ އާއި އޭއެފްސީން ވަނީ އެ ކަމާ މެދު ގޮތެއް ނިންމަންދެން އިންތިހާބު ހުއްޓުވައިފަ އެވެ.