Ansar Ibrahim
އެފްއޭއެމްގެ ރައީސް ބައްސާމް އަދީލް ޖަލީލްގެ ދެ ދައުރުގައި އެކްސްކޯ މެމްބަރެއްގެ ގޮތުގައި ހުންނެވި މުފާވިޒް ހާޝިމް (މުފާ) އެ އެސޯސިއޭޝަނުގެ އެކްސްކޯ މެންބަރު ކަމުން އިސްތިއުފާ ދެއްވައިފިއެވެ.
މިދިޔަ މަހުގެ 31 ވަނަ ދުވަހު ބޭއްވުމަށް ހަމަޖެހިފައިވާ އިންތިޚާބުގައި ރައީސް ކަމަށް ވާދަކުރެއްވި މުފާ ވަނީ އެފްއޭއެމްގެ އެކްސްކޯއިން އިސްތިއުފާ ދެއްވާފައިވާކަން ކަށަވަރުކޮށްދީފައެވެ.
އެފްއޭއެމްގެ ކުރީގެ ރައީސް އަދި މަހިބަދޫ ދާއިރާގެ މެމްބަރު އަހުމަދު ތޯރިގު (ޓޮމް) ގެ އިސްތިއުނާފީ މައްސަލަ ބެލުމަށް އެފްއޭއެމުން ކޮމިޓީއެއް ނުއުފައްދާތީ އިންތިހާބުގެ ކަންކަން މެދުކަނޑާލައި އަލުން ކޮމިޓީތައް އުފައްދަން ފީފާއިން އަންގާފައިވެއެވެ.
އެފްއޭއެމުން ވަނީ މި މަހު ކޮމިޓީތައް އެކުލަވާލައިފައެވެ. މިހާރު އޮތީ އިންތިޚާބު އަލުން އިޢުލާނު ކުރުމެވެ.
ބައްސާމް ދެން އޮންނަ އިންތިޚާބުގައި ވާދަކުރައްވާނެ ކަމަށް ބެލެވެއެވެ. މިމަހު ބޭއްވި ކޮންގްރެސްއަށް ފަހު ނޫސްވެރިން ސުވާލު ކުރުމުން އެ ކަމަށް އޭނާ ސާފު ޖަވާބެއް ދެއްވާފައެއް ނުވެއެވެ.
