Ansar Ibrahim
ފައިނަލުގައި ވިކްޓަރީ އަތުން 3-2 އިން މޮޅުވެ މަސްއޮޑި ސްޕޯޓްސް ކްލަބުން ވަނީ 2023 ވަނަ އަހަރުގެ ދެވަނަ ޑިވިޝަންގެ ޗެމްޕިއަންކަން ހޯދައިފައެވެ.
މުބާރާތުގެ އެންމެ މުހިންމު ޓާގެޓް ދެ ޓީމަށް ވެސް ހާސިލްވީ ސެމީ ފައިނަލް މެޗުތައް ކާމިޔާބުކޮށް ފައިނަލަށް ދިއުމުންނެވެ. ފައިނަލަށް ދަތުރުކުރާ ދެ ޓީމަށް ފުރަތަމަ ޑިވިޝަނުގެ ޖާގައެއް ކަށަވަރުވެފައި ވެއެވެ.
މެޗުގެ ކުރީކޮޅު ދެ ލަނޑުގެ ލީޑެއް މަސްއޮޑި ސްޕޯޓްސް ކްލަބުން ނެގި މި މެޗުގެ ފަހުކޮޅު ވިކްޓަރީން ވަނީ ނަތީޖާ ހަމަހަމަ ކޮށްފައެވެ. ނަމަވެސް މެޗުގެ ފަހުވަގުތު މަސްއޮޑި ސްޕޯޓްސް ކްލަބުން ލަނޑެއް ޖަހައި 100 ޕަސެންޓް ރެކޯޑާއެކު ދެވަނަ ޑިވިޝަނުގެ ތަށިވަނީ ކާމިޔާބު ކޮށްފައެވެ.
View this post on Instagram
މެޗުގެ 24 ވަނަ މިނެޓުގައި އަބްދުالله ޒިޔާން ނަގައިދިން ހުރަހަކުން އިބްރާހިމް ވަހީދު ހަސަން (އިއްބެ) ވަނީ އެ ޓީމަށް ލީޑު ނަގައިދީފައެވެ. އޭގެ ހަތަރު މިނެޓު ފަހުން, ހުސެއިން ޝަރީފް (މުޑާ) ވަނީ އެ ޓީމަށް ލީޑު ފުޅާކޮށްދީފައެވެ.
ފުރަތަމަ ހާފު ނިމުމުގެ މިނެޓެއް ކުރިން ވިކްޓަރީއަށް ލަނޑު ޖަހައިދިނީ ހުސެއިން ނިޔާޒް މުހައްމަދު (ބޮކުރީ)އެވެ. ދެވަނަ ހާފުގެ ފަހުކޮޅު އެ ޓީމުގެ ކެޕްޓަން އަކްރަމް އަބްދުލް ޣަނީ ވަނީ ނަތީޖާ ހަމަހަމަކޮށްފައެވެ.
މެޗުގެ އިތުރު ވަގުތުގެ ދެވަނަ މިނެޓުގައި އަލީ ޝާމިސް (ތޮއްޕޭ) ނަގައިދިން ހުރަހަކުން މަސްއޮޑި ސްޕޯޓްސް ކްލަބަށް އަލުން ލީޑު ނަގައިދީ ތަށި ޔަގީންކޮށްދިނީ އޮޑެލީ ފެލިކްސް ޗީޑީއެވެ.
